Lənkəranda yaşayış evində ilanlar peyda olub. 

"Mediatv.az"ın xəbərinə görə, bu barədə APA-ya rayonun Rvo kənd sakini Xankişi Məmmədov məlumat verib.

Onun sözlərinə görə, ötən gecə yaşadığı evin ikinci mərtəbəsinə çıxarkən iki ilanın bir-birinə sarılaraq gəzdiyini görüb. Onları öldürdükdən sonra Xankişi Məmmədov daha bir neçə ilanın da peyda olduğunu bildirib.

Doqquz nəfərin yaşadığı iki mərtəbəli evdə indiyədək belə bir hadisənin baş vermədiyini söyləyən ev sahibi baş verənlərdən ailə üzvlərinin şoka düşdüyünü söyləyib. Hadisə baş verən gecə isə azyaşlı uşaqların da daxil olduğu ailənin bütün üzvləri həyətdə gecələməli olublar.

Məlumata görə, evin birinci mərtəbəsindəki pəncərəni sökən zaman xeyli ilan qabığı da aşkarlanıb. Vəziyyətin ciddiliyini nəzərə alan kənd sakinləri bu barədə müvafiq qurumlara məlumat veriblər.

Qeyd edək ki, öldürülən ilanların uzunluğu 1 metrdən 1 metr 20 santimetrədək olub. Onların qızılı rəngə çalması isə zəhərli olmasına dəlalət edir.