Türkiyə Diyarbəkir vilayətinin Bağlar rayonunda PKK terror qruplaşmasına aid böyük bir cəbbəxana ələ keçirilib. ANS PRESS-in məlumatına görə, bu barədə Diyarbəkirin valisi Hüseyn Aksoy verdiyi açıqlamada bildirib. Əməliyyatlar vaxtı bir polisin şəhid olduğunu, 10 terrorçunun isə məhv edildiyini bildirən Aksoy terrorçulara dəstək verməyən diyarbəkirlilərə də təşəkkürünü bildirib. Vali, komendant saatının da ləğv olunacağını deyib.
“Komendant saatı elan etdiyimiz küçələrdə bu qadağaya həssasiyyətlə riayət edən saskinlərə, habelə barrikada quraraq çuxur qazan terrorçulara dəstək verməyən diyarbəkirlilərə təşəkkürümü bildirirəm. Əməliyyatlar vaxtı 10 terrorçu məhv edilib, 16 nəfəri yaralı olmaqla 23 terrorçu yaxalanıb, həmçinin 50 barrikada dağıdılıb və 10 çuxur doldurulub.”
Vali Hüseyn Aksoy terrorçulara aid sığınacaqlardan çox sayda silahla bir miqdar narkotik maddə aşkarlanaraq götürüldüyünü qeyd edib.
“Əməliyyat zamanı 10 ədəd qumbaraatan, 440 ədəd bu silaha aid sursat, 81 ədəd iriçaplı silah, 290 ədəd iriçaplı silaha aid maqazin, 120 min 70 ədəd iriçaplı silaha aid fişəng, 1 tapança, 2 maqazin, 90 ədəd əl qumbarası, 22 ədəd 20 litrlik bidonda kustar üsulla hazırlanmış bomba, 17 min 875 kq bomba hazırlamaq üçün istifadə olunan vasitələr, 5 ədəd mobil telefon, 2 ədəd kamera, 2 ədəd tüfəng durbini, 22 ədəd kamikadze jileti, 15 ədəd güllə qətəri, çox sayda səhiyyə və tikinti vasitələri, habelə bir miqdar narkotik aşkarlanaraq götürülüb.” 
PKK terror təşkilatının son bir həftə ərzində paytaxt Ankarada və İstanbulda törətdiyi terror aktları nəticəsində ümumilikdə 42 nəfər dünyasını dəyişib.