“Devalvasiya yolu ilə Azərbaycanı ikinci dəfə qlobal proseslərin təzyiqindən qoruyan Mərkəzi Bank gələcəkdə neftdən asılılığın azaldılmamasının zərərli olacağını bildirir.”
Mediatv.az xəbər verir ki, Mərkəzi Bankın sədri Elman Rüstəmov bildirib ki, tezliklə neftdən kənarda ixrac potensialı yaradılmalıdır, artıq bunun üçün məzənnə əlverişli edilmişdir:
“Biz daim neftin qiymətinə və neftdən nə qazandığımıza gözümüzü diksək, bu bizim üçün uduşlu variant deyil. Biz yaxşı şaxələnmiş iqtisadiyyata, ixraca malik olmalıyıq. Şaxələnmiş iqtisadiyyat yaxşı məşğulluq təmin edir. Belə iqtisadiyyatda yüksək gəlirli iş yerləri olur”.
Elman Rüstəmov qeyd edib ki, bu gün məzənnə dəyişikliyinə insanların əllərində Manatda olan pulların dəyərsizləşməsi, xarici valyutadakı pulların isə dəyərinin qalxması kimi baxılırsa, bu, statistik bir yanaşmadır:
“Bizi daha çox maraqlandırır ki, gələcəkdə insanlar necə çalışacaqlar, necə gəlir götürəcəklər? Biz bundan əvvəlki 10 ildə əldə etdiyimiz nailiyyətləri heç cürə itirə bilmərik. Biz iqtisadi artım üzrə dünya liderlərindən olmuşuq. Biz yüksək iqtisadi artım templərini bərpa etməliyik. Orta gəlirli dövlətlər qurupundan yüksək gəlirli dövlətlər qrupuna keçmək lazımdır. Üzən məzənnə rejiminə keçərək ixrac üçün imkanlar yaratdıq. Çətin görünən bu addımı atmaq məcburiyyətindəydik”.