"Gömrük yoxlamalarının sadələşdirilməsi ilə bağlı Fərman sahibkarlara aid deyil".

Mediatv.az xəbər verir ki, bu sözləri jurnalistlərə Dövlət Gömrük Komitəsinin sədri Aydın Əliyev Azərbaycan Respublikasının Prezidenti İlham Əliyevin gömrük sahəsində yoxlamaların sadələşdirilməsi ilə bağlı imzaladığı Fərmana əsasən görüləcək işlər barədə məlumat verərkən söyləyib.

Aydın Əliyev bildirib ki, Fərmandakı maddələrə əsasən müəyyən dövlət qurumlarına və Dövlət Gömrük Komitəsinə tapşırıqlar verilib. Bu sahədə olan strategiya müəyyənləşib:

“Fərmana əsasən Nazirlər Kabinetinə 3 ay, Dövlət Gömrük Komitəsinə isə 1 ay vaxt verilib. Fərmanda kommersiya və istehsalat fəaliyyəti üçün nəzərdə tutulmayan mallar göstərilir. Bu Fərman əhalinin sosial-iqtisadi vəziyyətinin yaxşılaşdırılmasına yönəlib və sahibkarlığa aid deyil. Gömrük yoxlamalarının sadələşdirilməsi yalnız vətəndaşların öz tələbatlarını ödəməsi üçün gətirilən mallara aiddir. Kommersiya və istehsalat üçün gətirilən mallara əvvəlki qaydada vergi tətbiq olunacaq”.