Bunu Trend-ə Azərbaycan Turizm Assosiasiyasının prezidenti Nahid Bağırov deyib.

O bildirib ki, hazırda AzTA və Mədəniyyət və Turizm Nazirliyi otellərdə otaq nömrələrinin qiymətlərinin endirilməsi ilə bağlı işlər aparır, görüşlər keçirir: "Bunun nəticəsi olaraq, artıq əksər otellər qiymət siyasətinə yenidən baxaraq müəyyən endirimlər edib, otaq nömrələrinin qiymətlərini minimum 20-30 faiz ucuzlaşdırıblar.

N.Bağırov qeyd edib ki, endirimlərin bundan sonra da davam etməsi gözlənilir və hazırda bu istiqamətdə işlər aparılır: “Artıq əksər otellər qiymətlərdə endirimlər edilir. Biz bu barədə yaxın müddət ərzində ictimaiyyətə əlavə məlumat verəcəyik”.

Assosiasiya sədri deyib ki, brend hotellərin fəaliyyətinin koordinasiyası Bakıdan olmadığı üçün yalnız yerli - Bakı və regionlarda yerləşən otellərdə qiymət siyasətinin dəyişdirilməsi üçün danışıqlar aparılır: “Qiymətlərin aşağı salınması elə də asan məsələ deyil. Çünki otellər şirkətlərlə müqavilə bağlayır və fəaliyyətlərini bu istiqamətdə qururlar. Bu müqavilələr dəyişdirilməlidir”.

Assosiasiya sədri bildirib ki, əslində, Gürcüstanla müqayisədə Azərbaycanda “beş” ulduzlu otellərin qiymətləri ucuzdur: "Gürcüstanda 5 ulduzlu oteldə bir otaq nömrəsinin bir günlük qiyməti 320 dollar olduğu halda, Azərbaycanda bu qiymət 240-150 dollar arasında dəyişir. Gürcüstanda “iki”, “üç” ulduzlu otellər çox olduğundan turistlər bu otellərdə qalmağa üstünlük verirlər. Bizdə “iki”, “üç” ulduzlu otellərin olmaması bu baxımdan problem yaradır”.

Qeyd edək ki, prezident İlham Əliyev Nazirlər Kabinetinin 2015-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında Azərbaycanda, xüsusilə bölgələrdə otellərin qiymətinin baha olduğunu deyib: “İndi Bakıda tanınmış brendlər fəaliyyət göstərir. Əlbəttə ki, onlar bütün dünyada fəaliyyət göstərir. Hazırda Bakıda otellər şəbəkəsi ən mötəbər şəbəkədir. Onların öz qiymət siyasəti var. Biz buna o qədər də qarışa bilmərik. Ancaq "beş" ulduzlu olmayan otellərin qiymətləri bahadır. Bölgələrdə, rayon yerlərində elə qiymətlər qoyurlar ki, heç adam oraya getmək istəmir”.

Azərbaycanda "üç" ulduzlu otellər azdır, "iki" ulduzlu otellər yoxdur: “O qədər də böyük maddi imkanlara malik olmayan ailələr istirahət edə bilmirlər. Budur reallıq. Azərbaycanda o qədər gözəl yerlər var ki, heç xaricə getmək lazım deyil. Dağlar, meşələr, dəniz, çaylar, göllər, xizək kurortu. Ona görə, bu üç məsələyə mütləq baxmaq lazımdır - vizalar, biletlərin, otellərin qiymətləri və "üç" ulduzlu, "iki" ulduzlu otellərin tikintisi. Yaxşı olardı ki, Mədəniyyət və Turizm Nazirliyi də bu məsələlərlə bağlı tövsiyələr versin və eyni zamanda, sahibkarlar da bunları eşitsinlər”.