Dünya (17-10-2022, 23:12)
Ukrayna İranı Rusiya ilə əlbir olmaqda günahlandırdı
Ukrayna İranı "Rusiyanın hərbi cinayətlərində əlbir olmaqda" ittiham edib.
Mediatv..az xəbər verir ki, bu barədə Ukrayna Xarici İşlər Nazirliyi bəyanat yayıb.
Bəyanatda qeyd olunur ki, Rusiya Federasiyası Ukraynanın mülki əhalisinə və mühüm infrastrukturuna qarşı terror hücumları üçün İran istehsalı olan pilotsuz döyüş aparatlarından istifadə etməyə davam edir:
“Həftə ərzində işğalçı qüvvələr Ukraynanın bir sıra şəhərlərində mülki hədəflərə 100-dən çox zərbə endirib. Kiyevdəki iki səfirliyin binasına ziyan dəyib. Ukraynanın enerji infrastrukturunun üçdə biri zərər çəkib. Uşaqlar da daxil olmaqla onlarla insan həlak olub və yaralanıb.
Ukraynada işğalçılıq müharibəsi aparmaq üçün silahların verilməsi və Ukrayna vətəndaşlarının öldürülməsi İranı Rusiyanın Ukraynaya qarşı təcavüz, hərbi cinayətlər və terror aktları cinayətinin şərikinə çevirir.
Ukrayna İranı Rusiyaya istənilən silah tədarükünü dərhal dayandırmağa çağırır. Əks halda, xüsusən də beynəlxalq məhkəmə çəkişmələri çərçivəsində ən ağır məsuliyyəti Tehran və onun rəhbərliyi daşıyacaq”.