Mozambikdə yas mərasimində 72 nəfər pivə zəhərlənməsindən dünyasını dəyişib. Xəstəxanalarda 36 zərərçəkən qalıb, ümumilikdə tibbi yardıma 150 nəfər müraciət edib. 

Oxu.Az-ın xarici KİV-ə istinadən verdiyi məlumata əsasən, insident Tete əyalətində yanvarın 11-də baş verib. O zaman 55 nəfərin öldüyü bildirilirdi. 

Polisin məlumatına əsasən, naməlum şəxslər içkiyə timsahın ödünü əlavə edib. Qeyd olunur ki, pivənin hazırlandığı çəllək insidentdən sonra itib və bu da araşdırmaları çətinləşdirib. Hazırda polisin bu cinayətin kimin törətdiyi barədə heç bir sübutu yoxdur. 

Zərərçəkənlər arasında yalnız spirtli içkini günorta qəbul edənlər var. Polisin fərziyyəsinə görə, pivə yas mərasimində iştirak edənlərin qəbiristanlıqda olduğu vaxt zəhərlənib. Eyni zamanda, içkini hazırlayan qadın, həmçinin onun ailə üzvləri də ölənlər arasındadır.