Bu gün Milli Qəhrəman, Vətən müharibəsi şəhidi Şükür Həmidovun şəhadətə qovuşmasının bir ili tamam olur.

Mediatv.az xəbər verir ki, 1975-ci ildə Qubadlı rayonun Armudluq kəndində anadan olan Ş. Həmidov didərgin düşdüyü rayonunun azadlığı uğrunda döyüşlərdə şəhid olub. 1993-cü ildə Bakı Ali Birləşmiş Komandalıq Məktəbinə qəbul olan Milli Qəhrəman 1995-ci ildə oranı "Motoatıcı" ixtisası üzrə bitirib. 

2006-cı ilin avqustunda isə Ş. Həmidov ixtisasın artırılması üçün Azərbaycan Silahlı Qüvvələrinin Hərbi Akademiyasının müdavimi olub və 2008-ci ildə təhsilini uğurla başa vurub. Pollovnik 2016-cı il Aprel döyüşlərində Lələtəpə yüksəkliyinin azad edilməsi uğrunda döyüşlərdə böyük şücaət göstərib. Göstərdiyi şücaətə görə ona müdafiə nazirinin əmri ilə vaxtından əvvəl polkovnik hərbi rütbəsi təqdim olunub. Şəxsi igidliyinə görə Azərbaycan Prezidenti İlham Əliyevin Sərəncamı ilə Azərbaycanın Milli Qəhrəmanı adına layiq görülüb. 

Polkovnik “Aprel döyüşləri” ilə bağlı xatirələrini danışarkən bunları deyib: “Bu dərələrdə texnikaları gizlətmişdik, kənardan seçilmirdi. Qruplarımız da burada ayrıldı. Burada ermənilərə yaxşı dərs verdik. Düşmən çaşğınlıq içərisində idi, başlarını itirmişdilər. Ermənilər Lələtəpə istiqamətindəki ərazini “Ohanyan səddi” adlandırırdılar. Onlar hesab edirdilər ki, burada möhkəmləniblər və guya bura keçilməz idi. Amma döyüşçülərimiz bu bir həddi göz qırpımında keçdilər. 40 dəqiqə ərzində bizim hərbçilərimiz həmin ərazini azad elədilər. 1 saatın sonunda həmin təpədə bayrağımız dalğanırdı. Bütün istiqamətlərdə düşmən pərakəndə şəkildə qaçırdı”. 

Qəhrəman hərbçimiz 2020-ci ilin sentyabrında başlanan Vətən müharibəsində Cəbrayıl, Füzuli və Qubadlıda gedən döyüşlərdə mərdliklə vuruşub. Oktyabrın 22-də Qubadlının azadlığı uğrunda döyüşlərdə şəhid olub və II Fəxri Xiyabanda dəfn edilib. Oktyabrın 23-də Azərbaycan Prezidenti İlham Əliyev Milli Qəhrəman Şükür Həmidovun atası Nəriman Həmidovla telefonla danışıb.
Dövlət başçısı Şükür Həmidovun həlak olması ilə bağlı başsağlığı verib və qeyd edib ki, Şükür Həmidov hələ Aprel döyüşləri zamanı göstərdiyi şücaətə görə Azərbaycanın Milli Qəhrəmanı adına layiq görülüb və Azərbaycan Prezidenti şəxsən özü ona qəhrəman ulduzunu təqdim etmişdi. İlham Əliyev Şükürün doğulduğu və azadlığı uğrunda həlak olduğu Qubadlı rayonunda onun adının əbədiləşdiriləcəyini vurğulayıb.
Qeyd edək ki, şəhid polkovnik ölümündən sonra “Vətən uğrunda” medalı və “Zəfər” ordeni ilə təltif olunub.
Bu ilin oktyabrın 14-də Milli Qəhrəman Şükür Həmidovun atası Nəriman Həmidovun arzusu həyata keçib. Belə ki, o oğlunun şəhid olduğu yerə gedərək torpağı öpüb. Ailəli olan şəhidin iki övladı Vətənə yadigar qalıb.