Görəsən   ETSN rəhbəri Hüseynqulu Bağırovun  Xırdalan Meşə Tingliyi və Toxumçuluq Mərkəzinin

“Əlizaminsayağı”  idarə olunmasından xəbəri  varmı ?

 Dünyada baş verən iqtisadi böhran artıq ölkəmizə də öz təsirini göstərmişdir. Aparılan  məqsədyönlü  tədbirlərlə  böhranın fəsadlarını minimuma endirməyi dövlət  öz qarşısına  prioritet vəzifə olaraq qoymuşdur. Ölkə başçısının dəfələrlə  israfçılığa, dövlət  əmlakının talan olunmasına və korrupsiyaya  son qoyulması barədə  göstərişlər verməsinə baxmayaraq  bəzi məmurlar  bunu qulaqardına vururlar. Elə Ekologiya və Təbii Sərvətlər Nazirliyin  Xırdalan Meşə Tingliyi və  Toxumçuluq  Mərkəzinin direktoru Əlizamin bəy  kimi.Mediatv.az-ın elektron poçtuna daxil olmuş məlumatlar bunu deməyə əsas verir. Belə ki, Əlizamin bəyin  özünəməxsus idarəçilik  metodu  mövcuddur. Mərkəzdə çalışan 80-ə yaxın işçinin 60-a yaxınının  məvacib kartı onun “cibində” olur. Tingçiliyin inkişafı  üçün ayrılmış torpaqlari işçilərlə “dədə malı kimi  bölüşdürə  bilməyən”  Əlizamin  bəyin onlarla əlbəyaxa olması da vurğulanır. Mərkəzin balansında olan texnikalar üçün ayrılan vəsaitləri eləcə də  meşəçilik  təsərrüfatı üçün əkilən tinglərin  suvarılmasına  ayrılan vəsaitləri peşəkarcasına mənimsəməyi bacaran direktor təkcə bunlarla kifayətlənmir. Onun  yaxınlıqdakı gölə gələn balıqçılardan  haqq  almağı barədə məlumatlar da qeyd olunur .

Daxil olmuş məlumatlarla əlaqədar əməkdaşımız sözügedən mərkəzə getmiş və türkürpədici mənzərələrin şahidi olmuşdur. Orada yüzlərlə qurumuş ting və istismara yararsız su maşınından başqa bir şey görə bilməmişdir. İlk baxışda uzun müddət müharibə şəraitində fəaliyyət göstərən bir təşkilatı xatırladan mərkəz ümumilikdə utanclıq hissi yaratmışdır. Burada böyük şair Səməd Vurğunun bir misrası yada düşür:

Tarix utanmazmı yaratdığından,

Dönüb keçmişinə baxmazmı insan.

Mediatv.az-a verilən məlumata görə mərkəzin direktoru çirkin əməllərini örtbasdır etmək üçün özünə nazirlikdə himayədar da tapmağa  nail olmuşdur. O,  “krişasını” əldə etdiyi vəsaitə şərik etməklə  özünə cəlb edə bilmişdir. Eyni zamanda Milli Məclisdə mühüm post tutan şəxsin ona himayədarlıq etdiyi bildirilir. Əlizamin bəyin bu yolla əldə etdiyi mülk və  obyektlərini araşdırmamızdan sonra təqdim edəcəyik.

Yaxın günlərdə bütün bunlar barədə daha ətraflı məlumat  verməyə çalışacağıq. Qarşı tərəfin də mövqeyini dərc etməyə  hazırıq.