Lerik Dövlət Rəsm Qalereyasında “Azərbaycan – doğma yurdum” adlı hərbi-vətənpərvərlik mövzusunda sərgi açılıb.

Qalereyanın direktoru Mükafat Yaqubovun verdiyi məlumata görə, sərgidə Azərbaycan Dövlət Rəssamlıq Akademiyasının heykəltəraşlıq fakültəsinin III kurs tələbəsi Əbdül Vahablının əl işləri nümayiş olunub. Müəllifin heykəltəraşlıq, rəngkarlıq və dekorativ işlərindən ibarət nümunələri tamaşaçıların marağına səbəb olub.

Mədəniyyət və Turizm Nazirliyindən Hafta.az-a bildirilib ki, ekspozisiyada 50-dən çox sulu boya, qrafika, rəngkarlıq, dekorativ tətbiqi-sənət əsərlərindən ibarət ağac üzərində oyma, şəbəkə, muncuqla bəzəmə, balıqqulağı ilə kompozisiyaları və heykəltəraşlıq nümunələri yer alıb. Əl işlərində vətənə məhəbbət, doğma yurda bağlılıq, qəhrəmanlıq, şanlı tariximiz əksini tapıb.

Sərgi üç gün davam edib.