Aran Regional Təhsil İdarəsinin qərarları bağçalarda xaos yaradıb
Mingəçevir şəhərinin bir neçə uşaq bağçasında valideynlərin və müəllim heyətinin ciddi narahatlığına səbəb olan vəziyyət yaşanır. Belə ki, tərbiyəçi-müəllimlər məzuniyyətə çıxdıqda, onların əvəzinə ixtisaslı müəllimlər yox, dayələr və ya heç kim təyin olunmur. Nəticədə bir çox qrup ya fəaliyyətini dayandırır, ya da uşaqlar baxımsız qalır.
Əvvəllər – yəni Aran Regional Təhsil İdarəsi yaradılmamışdan əvvəl – əvəzləyici müəllim sistemi mövcud idi. Müəllim məzuniyyətə çıxanda, onun yerinə müvəqqəti digər ixtisaslı şəxs təyin edilirdi. Bu həm tədrisin davamlılığını təmin edir, həm də uşaqların psixoloji və fiziki təhlükəsizliyinə zəmanət verirdi.
İndi isə vəziyyət fərqlidir.
İddialara görə, Aran Regional Təhsil İdarəsi əvəzləyici müəllim məsələsinə biganə yanaşaraq bildirir ki, kim istəyirsə, ictimai əsaslarla – yəni ödənişsiz – şəkildə əvəz etmə işini yerinə yetirsin. Bu yanaşma nə əmək qanunvericiliyinə, nə də pedaqoji prinsiplərə uyğundur.
Bir valideynin sözlərinə görə:
“Uşağımı dövlət bağçasına rahat ürəklə aparmaq istəyirəm. Ancaq müəllim məzuniyyətdə olanda uşaqları ya evə qaytarırlar, ya da heç kimlə buraxırlar. Nəzarətsiz uşaqla bağlı kim məsuliyyət daşıyacaq axı?” – deyə adının çəkilməsini istəməyən valideyn bildirir.
Oxşar narahatlığı müəllimlər də bölüşür. Adının açıqlanmasını istəməyən bir tərbiyəçi deyir:
“Biz istirahətə çıxanda yerimizə baxan olmur. Ya dayəni ora salırlar, ya da heç kim olmur. Dayə isə nə tərbiyə proqramını bilir, nə də uşaqla pedaqoji şəkildə davranmağı. Sonra da bütün məsuliyyət yenə müəllimin üstünə yüklənir.”
Başqa bir müəllim isə əlavə edir:
“Biz öz sahəmizdə təcrübəliyik, uşaq psixologiyasını anlayırıq. İndi deyirlər ki, kim istəsə, ictimai əsaslarla əvəz etsin. Bu nə deməkdir? Kim peşəkar işi pulsuz görər? Bu, həm qanunsuzdur, həm də alçaldıcı yanaşmadır.”
Təcrübəli pedaqoqlar bildirirlər ki, dayələrin işi – uşağın yeməyi, təmizliyi və nizam-intizamla bağlı qayğısıdır. Onların üzərinə pedaqoji funksiyaların yüklənməsi həm qanunsuzdur, həm də uşaq psixologiyası üçün zərərlidir. Bəs belə olan halda dayənin öz vəzifəsi kim tərəfindən icra olunur?
Problemin kökü – idarəçilik boşluğu
Aran Regional Təhsil İdarəsinin bu məsələyə qeyri-rəsmi münasibəti narahatlıq doğurur. Əgər bir sistemdə məzuniyyət zamanı əvəzləyici işçi təyin olunmursa, bu, sadəcə bürokratik laqeydlik deyil, eyni zamanda uşağın hüquqlarının pozulmasıdır. Uşağın təlim-tərbiyə prosesi kəsilirsə, buna birbaşa cavabdeh olan orqan bu prosesi dərhal araşdırmalı və həll yolları təklif etməlidir.
Nəticə olaraq:
Mingəçevirin uşaq bağçalarında əvəzləyici müəllim probleminin həll olunması təxirəsalınmazdır. Bu, təkcə təhsil məsələsi deyil, həm də cəmiyyətin gələcəyinə yönəlik bir məsuliyyətdir. İctimai əsaslarla müəllim işlətmək kimi təkliflər isə nə pedaqoji etika ilə, nə də qanunla uzlaşır.шаблоны для dle 11.2