AXCP sıralarından qeydə alınan istefalardan sonra növbə Müsavat Partiyasına da çatdı.

Bu gün keçmiş millət vəkili Nəsib Nəsibzadə Müsavat partiyasından istefa verdiyini bəyan edib.

Müxalifət təşkilatlarında qeydə alınan istefaları Gün.Az-a şərh edən Sosial-Demokrat Partiyasının (ASDP) sədri Araz Əlizadə bu tendensiyanın davamlı olacağını deyib:

“Əslində, müxalifət partiyalarından istefalar təəccüb doğurmamalıdır. İnsanlar real vəziyyəti başa düşdükdən sonra AXCP-yə, Müsavata inanmaqda səhv etdiklərini anlayırlar.

Bəziləri bu səhvi bir qədər tez, bəziləri isə gec dərk edirlər. Bu partiyaları tərk edənlərin çoxalması da göstərir ki, AXCP və Müsavatın üzvləri artıq ağıllanırlar, həmin təşkilatlardan fayda olmayacığını görürlər. Ona görə də partiyadan çıxırlar.

Onlardan bəzilərini indiyə kimi müəyyən vasitələrlə - birinə pul verməklə, birini başqa cür şirnikləndirmə ilə partiyada saxlayırdılar. Artıq bunların heç biri olmadığından, o şəxsləri partiyada saxlayan bir amil qalmayıb.

Məsələyə daha geniş baxdıqda isə həmin şəxslərin AXCP və Müsavatdan imtina etmələri bu partiyaların siyasi perspektivinin olmamasından irəli gəlir”.