Hafta.az-a açıqlamasında politoloq Qabil Hüseynli “AzərRos” üzvlərinin prezident İlham Əliyevə ünvanladığı müraciətə münasibət bildirib. O söyləyib ki, Abbas Abbasov Rusiyadakı bəzi dairələrin əlində siyasi alətə çevirilib: 

“Abbas Abbasov Azərbaycanda prezident seçkiləri ərəfəsində “Milyarderlər İttifaqı” adlı planı ilə  ölkəmizdə  hakimiyyət dəyişikliyi üçün cəhd etdi. Bu təbii ki, Rusiyanın tapşırığı əsasında aparılan siyasət idi.  Abbas Abbasovun məqsədi vəzifə tutmaqdır. Bunun  üçün o, Rusiyadakı müəyyən dairələrin dəstəyindən də istifadə etməyə çalışır.  Əsl “AzərRos”un başında duran adamlar, onu yaradanlar başqa şəxslərdir. Abbas Abbasov belə baxanda  heç bir xeyir verməyib. Mən onunla bir yerdə işləmişəm. Bütün hərəkətlərini də izləmək imkanına malik olmuşam. Belə hesab edirəm ki, Abbas Abbasov heç vaxt Azərbaycan siyasi hakimiyyətinə və Heydər Əliyevə qarşı loyal münasibətdə olmayıb. Onun münasibətlərinin hamısı üzdə olub. Arxada isə tamam başqa adam olub. Abbas Abbasov bildirir ki, o Heydər Əliyev yolunu davam etdirir. Əslində o, bu addımı ilə Heydər Əliyevə, Azərbaycan hakimiyyətinə xəyanət edib ”.

Qeyd edək ki, “AzərRos” Rusiya Azərbaycanlılarının Federal Milli-Mədəni Muxtariyyətinin bir qrup üzvü prezident İlham Əliyevə baş nazirin keçmiş birinci müavini Abbas Abbasovdan şikayət məktubu göndəriblər.