Müğənni Miri Yusif türkiyəli ifaçı Funda Ararın səsləndirdiyi "Bağışla" mahnısının ona aid olduğunu iddia edib. 

Müəllifin adının qeyd olunmadığından şikayətlənən M.Yusif qarşı tərəfi məhkəməyə verəcəyini bildirib. 

Sənətçinin oğurluq iddialarına cavab gecikməyib. Türkiyəli şair, mahnının sözlərini türk dilinə çevirən Günay Çoban məsələyə sosial şəbəkədə münasibət bildirib:

"Klip, albom, mətbuat orqanlarında bu haqda yazılıb. Gerçəyi bilmədən "oğru" demək çox çirkindir. Səhv bilirsiniz. Mahnının sahibi Murad Quliyev - MC Muraddır. Özündən Azərbaycan və Türkiyə müəllif hüquqlarından icazə alınıb".

F.Arar isə "Günay Çoban bu gözəl sözlər sənin qələmindən necə çıxır? Kim bilir sənin dərin ruhunda daha nələr gizlənib" sözlərini yazıb.   MC Murad əməkdaşımızla söhbətində bəstənin müəllifinin özü olduğu xəbərini təsdiqləyib:

"Mahnının sözləri də, musiqisi də mənə aiddir. Yaxın günlərdə bu məsələ ilə bağlı geniş açıqlama verəcəm".

MC Murad "Funda Arar ifa etmək üçün sizdən icazə alıb" sualına isə "Bəli" deyə cavab verib.

Mediatv.az