"20 illik direktorluq fəaliyyətim dövründə rəhbərlik etdiyim lisey Bakı Şəhər Təhsil İdarəsinin (BŞTİ) tabeliyində olan 330-dan cox orta ümumtəhsil məktəbi və liseylər arasında həmişə nəticə qazanmış təhsil müəssisələri sırasında olub. Yaratdığım şəffaf təhsil mühiti müəllim kollektivinin əldə etdiyi uğurların əsas səbəbidir. Nəticədə, liseyimiz BŞT-nin və Təhsil Nazirliyinin dəfələrlə “Fəxri fərman”ları və pul mükafatları ilə təltif edilib".

"AzPolitika.info" xəbər verir ki, bunları Əməkdar müəllim, 2 nömrəli Texniki-Humanitar Liseyin müəllimi və həmin liseyin 20 il direktoru olmuş Bəkir Mustafayev Təhsil naziri Emin Əmrullayevə mətbuat vasitəsilə müraciətində yazıb. B.Mustafayev qeyd edir ki, 2019/2020 tədris ilinin əvvəlində BŞTİ tərəfindən fəaliyyətinə ləkə yaxmaq cəhdləri olub və bu barədə, həmçinin Təhsil İdarəsində rüşvət və korrupsiya faktları barədə naziri məlumatlandırmaq istəyir: "Müddətli əmək müqaviləsi ilə calışan direktor müavinlərindən müqavilənin 1il artırılması üçün tələb olunan rüşvət; 65 yaş həddini keçmiş müəllimlərdən müqavilənin 1 il artırılması üçün tələb olunan rüşvət; Məktəb direktorlarının BŞTİ-yə dəvət edilərək aylıq pul tələb edilməsi…

Qarşılaşdığım bu korrupsiya faktlarına etirazıma görə BŞTİ-nin “torbatikmə” əməliyyatı ilə üzləşdim və bu barədə də Sizi məlumatlandırmaq istəyirəm”, - keçmiş direktor nazirə yazır.

B.Mustafayevin müraciətinin ardında oxuyuruq: “Cənab Nazir! Məlumatlı idim ki, BŞTİ-nin “İnsan resusları” sektorunun əməkdaşı Səbinə Səfərova məktəb direktorlarını BŞTİ-yə dəvət edərək hər ay 500 manat pul tələb edir. Təhsildə bu rəzalətə inanmırdım, amma mənə də həmin zəng gəldi, BŞTİ-ə dəvət edildim. Faktın doğruluğunun təsdiqi ücün əvvəlcədən maaşımdan 500 manat pul ayırıb konvertdə saxlamışdım. Səbinə Səfərova “yaxın qohumlarının yüksək vəzifələrdə işlədiyini və hec kimdən qorxmadığınl deyib, hər ay 500 manat verməyimi tələb etdi. Mən 500 manatı Səbinə Səfərovaya verdim. Növbəti ay o başqa məktəb direktorlarının vaxtında gəldiyini dedi, mənim gecikməyimə iradını bildirdi. Mən BŞTİ-ə gələrək "Səbinə Səfərova, xalanız oğluna (R.Tağıyevə) çatdırın ki, Bəkir müəllim nə kimdənsə pul alır, nə də kiməsə də pul vermir”, deyərək etiraz etdim…"

Bəkir Musatafayev daha sonra Təhsil nazirinə suallar ünvanlayıb: "BŞTİ-nin müdiri bu rüsvaycılığı bilirdisə, niyə qarşısını almırdı? BŞTİ-nin “Daxili nəzarət” sektorunun müdiri Sərxan Rzayev ən azından kar və kor olmalı idi ki, bu rüsvayçılıqdan xəbərdar olmasın...

Cənab nazir, 2020/2021-ci tədris ilinin əvvəlində BŞTİ-ə iki məktubla direktor müavini N.Şıxəliyevanın və 65 yaş həddini keçmiş Əməkdar müəllim S.Bədəlovanın müddətli əmək müqaviləsinin bir il artırılması barədə müraciət etmişəm. Dərs ilinin başlanmasına az vaxt qalsa da məktubun cavabı gəlmədi və səbəbini Səbinə Səfərovadan soruşdum. Hər birindən 1000 manat rüşvət tələb etdi. N.Şıxəliyeva razılaşdığı üçün müqaviləsi bir il artırıldı. Əməkdar müəllim S.Bədəlova isə təhsildən uzaqlaşdırıldı.

35 illik pedaqoji fəaliyyətim dövründə rastlaşmadığım rəzalətin şahidi oldum. Əməkdar müəllimdən əmək müqaviləsinin bir il artırılması üçün 1000 manat tələb etmək xalqa, təhsilə və gələcəyimizə qarşı xəyanətdir! Bu rəzalətə etirazıma BŞTİ-dən adekvat cavab gecikmədi. İdarənin müdiri R.Tağıyev tərəfindən “Daxili nəzarət” sektoruna tapşırıq verildi ki, B.Mustafayev təhsildən uzaqlaşdırılmalıdır. Sektoru müdiri Sərxan Rzayev bu “işi” öz əməkdaşı Bakir Məmmədova tapşırır. B. Məmmədov isə 70 saylı məktəb liseyin diektorundan bir nəfər yaxşı oxuyan VI sinif şagirdinin "şəxsi işi"ni BŞTİ-ə gətirməyi xahiş edir. Qeyd edim ki, şagirdin “şəxsi işi”ni ancaq onun valideynləri götürə bilər. Bakir Məmmədov əlaltısı Samir adlı birindən konvertdə 800 manat və həmin “şəxsi işi” verərək şagirdin dayısı kimi özünü təqdim edib, pul qarşılığında müsabiqəsiz onu liseyə qəbul etdirməyi tapşırır. Həmin “dayı” isə liseyə gələrək direktor müavini N.Şıxəliyevanın liseyin direktoru olduğunu zənn edərək pulu və sənədləri ona verir və beləliklə B.Məmmədovun “torbatikmə” əməliyyatı bitir. B.Məmmədov isə Samirə “torbatikmə” əməliyyatının səhv icra edildiyini bildirib. Samir bir necə gündən sonra liseyə yenidən gələrək ”ailələrində rəhmətə gedən olduğu üçün həmin şagirdin liseyə gəlib-getməsi çətinləşib”, deyərək 800 manatın və “şəxsi iş”in geri qaytarılmasını tələb edir. Günün sonunda bu ssenarinin mənim üçün hazırlandığını bildim. Həmin şagirdin “Şagird-məzun” sistemindən şəxsi məlumatlarını əldə edərək doğma dayısı ilə görüşdüm. O, ailədə rəhmətə gedən olmadığını və həmin şagirdin liseydə təhsil alması barədə planlarının olmadığını bildirdi. Baş verənləri BŞTİ-nin "Daxili nəzarət" sektorun əməkdaşı Nazim Bağırova bildirdim. Mən, direktor müavinləri və lobarant ifadələr versək də, iş məharətlə ört-basdır edildi".

Əməkdar müəllim daha sonra qeyd edir ki, İdarənin "Daxili nəzarət" sektorunun əməkdaşı Bakir Məmmədovun əmək fəaliyyətini araşdırıb: “Əvvəl işlədiyi polis orqanından qovulmuş, pedaqoji fəaliyyətdən xəbərsiz, maşın bazarında alverçi olan bu ... (Kobud ifadə işlədilir-red.) BŞTİ-də necə işlə təmin olunması sual doğurur. Qeyd edim ki, B.Məmmədovun “torbatikmə” əməliyyatı baş tutmadığına görə bu işin davamı Nazim Bağırova tapşırılıb. 35 illik pedaqoji fəaliyyətimdə rastlaşmadığım növbəti rüsvayçılıqla üzləşdim. Sentyabrın 25-də liseyə komissiya göndərildi, əlbəttə, məqsəd məlumdur. Bundan əvvəl BŞTİ-nin müdiri R.Tağıyevdən baş verənlərin səbəbini öyrənmək üçün üç dəfə məni qəbul etməsini xahiş etsəm də, hər dəfə pandemiyanı bəhanə edərək imtina etdi. Daha sonra “Aylıq 500 manat verə bilmədiyim üçün məni lisey direktoru vəzifəsindən azad edin” məzmunlu ərizə yazaraq, katibədən ona çatdırmağı xahiş etdim".

Keçmiş direktor müraciətində yazır ki, ərizənin cavabı olaraq növbəti riyakarlığın şahidi olub: "“Daxili nəzarət” sektorunun əməkdaşı N.Bağırov tərəfindən liseydə aparılmış məqsədli yoxlamanın qərəzli hazırlandığını bildirərək rədd etmişəm. Qeyd edim ki, BŞTİ-də təsvir etdiyim rüsvayçı əməlləri təşkil edən, rüşvət və korrupsiya faktlarını bilərəkdən gizlədən sektor müdiri Sərxan Rzayev “səmərəli fəaliyyətinə” görə Təhsil Nazirliyinin “Fəxri Fərmanı” ilə təltif olunub. BŞTİ-nin “Daxili nəzarət” sektoru “aylıq verməyən məktəb direktorlarına nəzarət” funksiyasını yerinə yetirir".

Əməkdar müəllim əlavə edir ki, nazirlə görüşmək istəsə də, hər dəfə müxtəlif səbəblər gətirilərək rədd edilib: "Sonuncu dəfə “Asan radio"da çıxışınızda telefon əlaqəsi yaradaraq məni qəbul etməyinizi xahiş etdim. Qəbul edəcəyinizi bildirsəniz də, bir məlumat almadım.

Cənab nazir! Xahiş edirəm, məni fərdi qəbul edəsiniz. Əminəm ki, bu görüşün Sizə faydası itirəcəyiniz zamandan qat-qat artıq olacaq..."

B.Mustafayevin bu ittihamları ilə bağlı BŞTİ-nin mövqeyini öyrənməyə çalışacağıq.шаблоны для dle 11.2