Rabitə və Yüksək Texnologiyalar Nazirliyinin keçmiş Aparat rəhbəri, hazırda həbsdə olan Vidadi Zeynalovun səhhətində problemlər var.

“Qafqazinfo” xəbər verir ki, bu haqda musavat.com-a onun vəkili CeyhunYusifov məlumat verib.

Onun sözlərinə görə, hüquqlarını müdafiə etdiyi şəxsin səhhəti qənaətbəxş deyil:

“Dəfələrlə müraciətlərimizə baxmayaraq Vidadi Zeynalovu Ədliyyə Nazirliyinin tibb müəssisəslərindən birində müayinədən keçirib müvafiq müalicə təyin etmirlər. Onun Penitensiar Xidmətin Tibb Müəssisəsinə köçürülməsi bizə məlum olmayan səbəblərdən həyata keçirilmir. Səhhətindəki problemlə əlaqədar olaraq o, görüş otağına gələrkən çox əziyyət çəkir. O, həbs edilməmişdən əvvəl diz qapağından əməliyyat olunub. Həmçinin, onun belində ağır dərəcəli onurğa yırtığı (qrıja) və sinir ağrıları var. Buna görə də Vidadi Zeynalov otura bilmir. O, ya yataqda uzanmalı, ya da ayaq üstə dayanmalıdır. Bu da ona çətinliklər yaradır.Vidadi Zeynalov mənə şiddətli ağrılarının olduğunu, buna görə gecələr yata bilmədiyini dedi. Saxlama şəraiti onun səhhətində çox ağır şəkildə özünü göstərir. 2 ay əvvəl müraciət etməyimizə baxmayaraq heç bir tədbir görülmür”.

Vəkil bildirib ki, V.Zeynalov xüsusi avadanlıqların olduğu tibb müəssisəsində müayinə olunmasını istəyir.

Qeyd edək ki, Cinayət Məcəlləsinin 179.3.2-ci (Mənimsəmə və ya israf etmə, külli miqdarda törədildikdə) və 308.2-ci (Vəzifə səlahiyyətlərindən sui-istifadə, bu Məcəllənin 308.1-ci maddəsi ilə nəzərdə tutulmuş əməllər ağır nəticələrə səbəb olduqda və ya seçkinin (referendumun) nəticələrinə təsir məqsədilə törədildikdə) maddəsi ilə ittiham olunan V. Zeynalov ötən ilin noyabrında saxlanılıb.