Müğənni İzzət Bağırov onu özündənrazı adlandıranlara mesaj göndərib. 

“Mediatv.az”-in məlumatına görə, “Şou məkan” verilişinə açıqlama verən müğənni sadə biri olduğunu bildirib:

 “Məni tanıyanlar bilir ki, mən özündənrazı deyiləm. Bir də ki, axı niyə özümdən razı olmayım? 13-14 yaşımdan səhnədəyəm. İllərdir ki, populyarlığımı qoruyub saxlamışam. Səsim səs, sənətim sənətdir. Qabiliyyətim, qanacağım, savadım, ağlım da göz qabağındadır. 26 ildir sükanı necə lazımdırsa, saxlayıram. Konsertlər vermişəm, filmə çəkilmişəm, saysız-hesabsız albomlarım var, 70-ə yaxın klip çəkdirmişəm, pərəstişkarlarım yetərincədir. Möhür möhür üzərinə vurmuşam. Özümdən razıyam, yaxşı eləyirəm. Məni bəyənməyənlər ola bilər. Maykl Ceksonu da sevməyənlər var idi. Bunlar xırda şeydir”.

Sənətçi ağırtəbiətli görünməsi ilə bağlı da danışıb: 

“Özümü uşaqlıqdan ağır aparmışam. Uşaqların içində də ağır aparırdım. Çox gülməklə aram yoxdur. Gərək ətrafımda o qədər yaxın insanlar olsun ki, deyib gülüm. Heç vaxt heç kimdən heç nə istəməmişəm. Heç bir şeyə görə kiminsə yanında əyilməmişəm. Kiminsə qarşısında ağlamağı sevmirəm. Ağlamağın da öz yeri var. Hər şeyi Allahdan istəmişəm”

Bağırov avtomobil həvəsindən söhbət açıb: 

“Azərbaycanda hamı bilir ki, mən “Xammer” həvəskarıyam. Bir ara “Xammer”i satıb, başqa maşın aldım. 7-8 ay sonra təzədən “Xammer” gətirtdim”.