Milli.Az-a açıqlama verən əməkdar rəssam bu illər ərzində çəkdiyi çətinliklərdən danışıb:

"Mən 26 il A.Şaiq adına Kukla Teatrında çalışaraq 60-a yaxın tamaşaya səhnə quruluşu vermişəm. 26 ilin 5 ilini bu teatrda baş rəssam kimi çalışmışam. Teatrda çalışdığım illərdə SSRİ və bir sıra xarici ölkələrdə, kukla teatrları festivallarında çıxış edib, laureat qazanmışam. Bu teatrda çalışmaqla yanaşı müxtəlif janrlarda unikal dekorativ-tətbiqi sənət nümunələri yaratmışam. Ad günümü adətən yaxınlarımla qeyd edirəm, 10-15 nəfərlə... Həmişə də dəbdəbədən uzaq olmuşam. Amma yadıma gəlir, 85 illik yubileyimi Azərbaycan Teatr Xadimləri İttifaqında təntənəli şəkildə qeyd etmişdilər. Həmişə də yaxın qohum-əqraba gəlib məni təbrik edirlər. Bu gün də gələ bilməyənlər sabah gələcək. Xoşladığım bir hədiyyə var, amma onu heç kimə demək istəmirəm (gülür). Zinət əşyalarım da var, amma istifadə etmirəm. Çünki yaş artıq öz sözünü deyir. Çox qocalmışam... O ki qaldı kiməsə hədiyyə verməyə... Vaxtilə buna çox maraq göstərirdim, hətta öz işlərimdən də bağışlayırdım. Bu sənətdə təbii ki, çətinliklərim çox olub. İşimi özüm bəyənməyincə heç kimə göstərmirdim. Bu uğurları gözlərimin zəifləməsinin hesabına etmişəm. Amma ki, heç nəyə baxmayaraq işimi çox sevmişəm, hələ də sevirəm".

Qeyd edək ki, 1987-ci ildən fərdi yaradıcılıqla məşğul olan əməkdar rəssamın yaratdığı 4 mindən artıq milli etnoqrafik kukla nəinki respublikamızın, xarici ölkələrin məşhur muzeylərində, həmçinin şəxsi kolleksiyalarda da saxlanır.

Teatr rəssamlığı ilə yanaşı, Solmaz Musayeva təsviri sənətin digər sahələrində də öz qabiliyyət və istedadını nümayiş etdirib. O, 6 cizgi filminə quruluş verib ki, onlardan "İlham" Özbəkistanın paytaxtı Daşkənddə keçirilən beynəlxalq festivalda I dərəcəli diploma, "Göyçək Fatma" isə Gürcüstan Rəssamlar İttifaqının mükafatına layiq görülüb.

Biz də saytımız adından Solmaz xanımı təbrik edir, 100 il yaşamasını arzu edirik.