Göyçayın icra başçısı kənd icra nümayəndələri və bələdiyyələrə pambıq əkdirir.

Vizual.az-ın əldə etdiyi xəbərə görə, Mübariz Ağayev məcburi qaydada yerli məmurları pambıq sahələrinə səfərbər edib.

İcra başçısının təlimatı əsasında ən azı 10 hektar sahədə pambıq əkilməlidir. M.Ağayevin yeni "iqtisadi proqramı” böhrandan çıxış üçün hesablanıb. Məlumata görə, pambıq əkilməsinin bütün xərclər onların üzərinə düşür.

Məhsul yetişərsə, kimə, hara, neçəyə satılacağı haqda heç bir müqavilə tərtib olunmur. Ancaq rayon rəhbərliyi tərəfindən göstəriş verilib ki, pambıq əkin. İqtisadi durum çətinləşdikcə "unikal” çıxış yolu tapan Göyçayın icra hakimi bələdiyyə və icra nümayəndələrini işə salıb.

Onlar isə nə edəcəyini bilmirlər. Vizual.az xəbər verir ki, hazırda rayonda "Göyçay-Pambıq” ASC fəaliyyət göstərir. M.Ağayevin də məmurlara həvalə etdiyi pambıqəkmə kampaniyasının bu müəsissəyə yönəldiləcəyi gözlənilir.

Xatırladaq ki, Göyçayda pambıq əkilməsi haqda bu günlərdə rəsmi məlumat da yer alıb. Azərtac aprelin 28-də xəbər verib ki, rayonda pambıq əkilməsi və barama yetişdirilməsi istiqamətində tədbirlərin icrasına başlanılıb.

Aparılan təhlillər zamanı müəyyən edilib ki, rayon üzrə əkinə yararlı torpaqların 1329 hektarından uzun illərdir istifadə olunmur. Bu sahədə vəziyyəti düzəltmək və istifadəsiz qalan torpaqları əkinə cəlb etmək istiqamətində hazırda müvafiq işlər görülür.

Bu da öz növbəsində Vizual.az-a rayondan verilən xəbəri dolayısı ilə təsdiqləyir və icra başçısının yerli çinovniklərə məcburi pampıq əkdirdiyi haqda məlumatları əks etdirir.

Onu da deyək ki, M.Ağayevin geridə qalan müddətdə və bu günkü fəaliyyəti haqda araşdırmalarımız var. Onları da yaxın günlərdə təqdim edəcəyik. Bununla belə Göyçay RİH-nin mövqeyini çap etməyə hazırıq.