İqtisadi və Sosial İnkişaf Mərkəzinin eksperti Rəşad Həsənov "Bizim Yol"a şərhində bildirdi ki, belə bir azalma gözlənilən idi: "Çünki azərbaycanlıların böyük bir qismi Rusiyada özəl sektorda fəaliyyət göstərir. Xüsusilə, ticarət sektorunda daha çox aktivdirlər. Ona görə də bu sektorda stabil gəlir yoxdur, qazancdan asılı olaraq gəlirlilik azalır. Yəni apardıqları ticarət dövriyyəsindən asılı olaraq, gəlir əldə edirdilər. Son illər Rusiya iqtisadiyyatında baş verən proseslər, rublun dəyərinin kəskin düşməsi nəticəsində həmvətənlərimizin gəlirləri ciddi şəkildə azalmağa başladı. Soydaşlarımızın bir qismi öz işlərini bağlamaq həddinə çatıblar, hətta iflas olanlar da var. Bu proseslər isə Azərbaycana daxil olan pul vəsaitlərinin azalmasına gətirib çıxarıb".

İqtisadçı prosesin ilin sonuna kimi davam edəcəyini dedi: "Rusiyada iqtisadi tənəzzülün bu il müəyyən qədər səngiyəcəyini düşünmək düzgün olmazdı. İlin sonuna kimi tənəzzül davam edəcək. Belə olan halda, Rusiyada yaşayan azərbaycanlı miqrantların sayında azalma baş verəcək. Məlumatlara görə, həmin dövlətdə miqrantların sürətlə çıxması prosesi gedir. Gəlir götürən miqrantlarımızın sayı azaldığı üçün Azərbaycana göndərilən vəsaitlərin də həcmi aşağı düşüb. Hələ açıqlanan rəqəmlər rəsmi statistikadır. Qeyri-rəsmi rəqəmlərdə Rusiyadan Azərbaycana göndərilən vəsaitlərin həcmi rəsmi statistikadan dəfələrlə üstündür. Belə ki, hər il 3-4 milyard dollar pul köçürüldüyü bildirilir. Müxtəlif hesablamalara görə, hazırkı situasiyada bu rəqəmin 1.5 milyard dollara qədər azalması proqnozlaşdırılır".

R.Həsənov qeyd etdi ki, azalma nəticəsində Azərbaycan bazarı 2-3 milyard dollar itirəcək. İqtisadçı Rusiyadan gələn vəsaitdən asılı olan ailələrin ciddi sosial çətinliklərlə üzləşdiyini bildirdi: "Alıcılıq qabiliyyəti kəskin şəkildə aşağı düşüb. Bunun bütün Azərbaycan iqtisadiyyatına mənfi təsirləri var. Həmin vəsaitlər müxtəlif yollarla bazara daxil olurdu. Və bazarda aktivliyin artmasına səbəb olurdu. Bildiyiniz kimi, Azərbaycan istehsalatının 95 faizi daxili tələbata yönəlirdi. Rusiyadan köçürülən pulun azalması daxili alıcılığı aşağı salır ki, bu da dolayısı ilə bütün ölkə iqtisadiyyatına sirayət edir. 

Bu yaxınlarda beynəlxalq təşkilatlar tərəfindən hazırlanan hesabatda göstərilirdi ki, Azərbaycan iqtisadiyyatı Rusiyadan 4 faiz asılıdır. Bu kiçik rəqəm deyil. Doğrudur, bu asılılıq digər MDB ölkələri ilə müqayisədə aşağıdır. Amma hər bir halda təsirlər özünü göstərir və göstərəcək".

Ekspertə görə, Rusiya iqtisadiyyatında baş verən tənəzzülün əsas zərbəsi Azərbaycandakı daşınmaz əmlak bazarına dəyir. Onun sözlərinə görə, keçən ilə kimi Rusiyada yaşayan soydaşlarımız öz vəsaitlərini Azərbaycandakı daşınmaz əmlak bazarına yatırmaqla tələb formalaşdırırdı: "Lakin indi onlar ölkəmizdə daşınmaz əmlak bazarının təklifçisinə çevriliblər. Rusiyada iş fəaliyyətlərində çətinliklər yarandığı üçün Azərbaycandakı əmlaklarını dəyər-dəyməzinə satmaqla, maliyyə əldə etməyə çalışdılar. Nəticədə son aylarda mənzillərin qiymətində ucuzlaşma baş verdi. Eyni zamanda rubl ucuzlaşandan sonra Rusiyada daşınmaz əmlakların qiyməti milli pulun dəyərində aşağı düşməyə başladı. Azərbaycanlılar Bakıda olan əmlaklarını sataraq, dolları Rusiyaya aparıb bu sektora yatırım qoydular".