Avropa İttifaqı Rusiyadan qaz idxalının üçdə ikisini azaltmaq üçün ilin sonuna son tarixi qoyub, lakin iqtisadi və logistika maneələri buna əngəl ola bilər. 

Mediatv.az “Financial Times”a istinadən xəbər verir ki, Aİ, Böyük Britaniya və ABŞ Ukraynadakı müharibəyə cavab olaraq Rusiya banklarına və Prezident Vladimir Putinlə əlaqəsi olan yüksək vəzifəli şəxslərə qarşı genişmiqyaslı sanksiyalar tətbiq etsə də, Rusiyanın neft və qaz idxalı Avropaya axmaqda davam edir.

Bildirilir ki, fevralın 24-də xüsusi əməliyyat başlayandan bəri Aİ Rusiyaya təkcə qaz idxalına görə 20 milyard avrodan çox pul ödəyib.

Nəşrin məlumatına görə, Avropa Komissiyası blokun 2022-ci ilin sonuna qədər Rusiya qazından asılılığını azaltmaq üçün iddialı strategiya dərc edib – lakin bu, nə dərəcədə mümkündür? 2021-ci ildə Aİ-nin qaz təchizatının 34 faizi Rusiyadan, əsasən də boru kəməri ilə idxal edilib. Şərqi, şimal-şərqi və mərkəzi Avropa ölkələri xüsusilə Rusiya təchizatından asılıdır. Ümumilikdə, Aİ 2021-ci ildə 155 milyard kubmetr Rusiya qazı idxal edib. Avropa Komissiyası bu ilin sonuna kimi digər mənbələrdən tədarükün artırılması və Rusiyadan gələn qaza tələbatın azaldılması hesabına bu məbləğin üçdə ikisini azaltmaq istəyir. Enerji sektorunda Aİ bərpa olunan mənbələrin bu il 20 milyard kubmetr qazı əvəz edə biləcəyinə ümid edir.