Amerika kəşfiyyatı növbəti dəfə Rusiyanın Ukraynanın şərq sərhədlərinə qoşun yeritməsi barədə xəbərdarlıq edib. Vəziyyətlə bağlı Fox telekanalına müsahibə verən Ağ Evin kəşfiyyat komitəsinin sədri Mayk Rocers rəsmi Moskvanın Ukraynanın şərq hissəsinə olan iştahından narahat olduğunu ifadə edib.

"Biz sərhədlərə on minlərlə qoşunun yeridildiyini müşahidə edirik. Onlar artıq Ukraynaya girməyə tam hazırdırlar. Rəsmi Moskva tərəfindən qərar qəbul ediləcəyi təqdirdə ordunun müdaxiləsi üçün hər cür imkan var. Ağır artilleriya, piyada dəstələri və xüsusi təyinatlılar hazır vəziyyətdədir. Düşünürəm ki, onlar təzyiqləri davam etdirəcəklər".

Rusiyanın Amerikadakı səfiri Sergey Kislyak isə, məsələyə şərh verərkən rəsmi Moskvanın Ukrayna sərhədlərini pozmağa çalışmadığını vurğulayıb.

"Rusiya əskləri Rusiya Federasiyası daxilində hərbi təlimlər keçirlər. Bu normal təlimlərdir. Ukrayna ilə Rusiya arasındakı gərginlik əslində, hazırkı Ukrayna hökuməti ilə rəsmi Moskva arasında olan problemlərlə əlaqədardır. Ukraynada regionların rəyini nəzərə ala bilmək üçün konstitusiya dəyişikliyi keçirilməlidir".

Ağ Evin kəşfiyyat komitəsinin sədri Mayk Rocers, Rus hərbisinin, eyni zamanda, Cənubi Osetiya sərhədlərinə artilleriya dəstələri göndərdiyini qeyd edib. Onun sözlərinə görə, rəsmi Moskva bununla Gürcüstan və Ermənistan vasitəsilə İranla körpü yaratmağa çalışır.

Bu arada, Rusiyanın xarici işlər naziri Sergey Lavrov Fransada amerikalı həmkarı Con Kerri ilə görüşüb. Parisdə baş tutan görüşdə tərəflər Ukraynada gərginliyi aradan qaldırmaq məqsədilə müzakirələr aparıblar.