Yəmən ordusunun 65 hərbi qulluqçusu üsyançı husilərin qurduğu pusquya düşərək həlak olub.

APA-nın TASS agentliyinə istinadən verdiyi məlumata görə, insident Yəmənin cənubundakı Aqaba Tara bölgəsində baş verib.

Şiddətli döyüş zamanı 15 nəfər itirən husilər həmçinin Yəmən ordusuna məxsus 8 zirehli maşını və 4 tankı məhv ediblər.

Bundan əvvəl bildirilirdi ki, Yəmən hökumət qoşunları ölkənin bütün cənub əyalətlərini nəzarət altına alaraq şimala doğru irəliləyirlər. Qeyd edək ki, Yəmənin paytaxtı Səna şəhəri husilərin nəzarəti altındadır.