İran neftinin Çinə tədarükü barter sxemi üzrə həyata keçirilir. Bu çərçivədə Çin İranda müxtəlif infrastruktur obyektləri inşa edir.

Teleqraf xəbər verir ki, bu barədə "The Wall Street Journal" qəzeti məlumat yayıb.

Qəzet yazır ki, prosesdə Çin sığorta şirkəti "Sinosure" və maliyyə təşkilatı "Chuxin" iştirak edir. Əməliyyatlar beynəlxalq bank sistemindən kənarda aparılır, əldə olunan vəsaitin bir hissəsi isə infrastruktur layihələrinin maliyyələşdirilməsinə yönəldilir.

Məlumata görə, ötən il Çin tərəfindən İranda həyata keçirilən iri infrastruktur layihələrinə 8,4 milyard dollar vəsait ayrılıb. Ümumilikdə, Çin XXI əsrin əvvəlindən bu yana İranda infrastruktur tikintisinə 25 milyard dollara qədər sərmayə qoymağı öhdəsinə götürüb.

Bundan əlavə, İran neft satışından əldə etdiyi gəlirləri birbaşa Çin mallarının alınmasına yönəldir.