Musavat.com Türkiyə mediasına istinadla xəbər verir ki, alman hava yolu nəhəngi "Lufthansa"nın törəmə şirkəti olan "Germanwings"`in qəzaya uğrayan Airbus A320 təyyarəsinin sığorta xərclərinə dair bilgi "Lufthansa" rəsmiləri tərəfindən açıqlanıb. 

Şirkətdən verilən açıqlamaya görə, 150 sərnişinlə birlikdə qəzaya uğrayan təyyarənin sığorta xərcləri üçün nəhəng "Münchner Allianz" sığorta şirkəti 300 milyon dollar ayırıb.

Münchner Allianz səlahiyyətliləri isə bu mövzuda şərh verməkdən imtina edib. Sözü gedən pul vəsaitindən faciə qurbanlarının yaxınlarına pay veriləcək.  Təyyarənin xərci də bu puldan qarşılanacaq. Ayrıca xilasetmə işlərinə görə yaranan xərclər də həmin 300 milyon dollardan ödəniləcək.

Qeyd edək ki, martın 24-də İspaniyanın Barselona şəhərindən havaya qalxan Airbus A320 Düsseldorfa gedərkən Alp dağlarına çırpılıb.

Hadisədə 150 nəfər həyatını itirib. Təyyarəni 27 yaşlı ikinci pilot Andreas Lubitzin qəsdən qəzaya uğratdığı bildirilir.