Azərbaycan dünyanın yeganə ölkələrindəndir ki, burda bəzi məmurlar tutduqları vəzifəyə əbədi, həm də qazanc mənbəyi kimi baxırlar. Bu gün vəzifədə təmsil olunan şəxslərin tərcümeyi-halına nəzər salanda görürük ki, onların bir neçəsi artıq 15-20 ildir kreslo sahibidirlər. Lakin dünyanın digər ölkələrində vəzifəli şəxslərin karyera müddəti bizdəki kimi uzunömürlü olmur.

Onlar iki-üç il, uzağı beş il işləyib daha sonra yerlərini başqalarına təhvil verirlər. Yadınızdadırsa, qəzetimizin əvvəlki saylarından birində "Ən varlı icra başçısı kimdir" başlığı altında yazı dərc etmişdik. Həmin məqalədə paytaxt rayonlarına rəhbərlik edən və ancaq var-dövlət yığmaq haqda fikirləşən bəzi icra başçılarının adı qeyd olunmuşdu. Bu gün isə sizə daha üç icra başçısının varidatı barədə məlumat vermək istəyirik. Hansı ki, həmin şəxslərin adı indiyə kimi bir sıra qalmaqallarda, o cümlədən biznes işlərində hallandırılıb. Başlayaq Sabunçu Rayon İcra Hakimiyyətinin (RİH) başçısı Adil Vəliyevdən. Son günlər adı mətbuatın gündəmindən düşmək bilməyən Adil Vəliyev icra hakimi postuna təyin olunana qədər biznes fəaliyyəti ilə məşğul olub. O, 2003-2012-ci illər ərzində özünün təsis etdiyi "Euro style" LTD şirkətində aktiv fəaliyyət göstərib. İcra başçısı təyin olunandan sonra isə şirkətin idarəçiliyini oğluna həvalə edib. Məmurun biznes fəaliyyəti ilə bağlı faktları diqqətinizə çatdırmamışdan öncə qeyd edək ki, Adil Vəliyev 20 aprel 1960-cı ildə Qubadlı rayonunda anadan olub. 1987-ci ildə Azərbaycan Dövlət Universitetinin hüquq fakultəsini bitirib. Əmək fəaliyyətinə 1977-ci ildə BEMZ-də çilingər kimi başlayıb. 1978-1980-cı illərdə hərbi xidmətdə olub. 1980-1990-cı illərə qədər fasiləsiz olaraq əmək fəaliyyətini BEMZ-də davam etdirib. 1990-1992-ci illərdə Nərimanov Rayon İcra Hakimiyyətində şöbə müdiri və Nərimanov Rayon İcra Hakimiyyəti başçısının müavini, 1992-1996-cı illərdə Bakı şəhər Xalq deputatları sovetində təlimatçı və şöbə müdiri, 1998-2003-cü illərdə Dövlət Neft Şirkətinin Dənizdə Neft-Qaz İstehsalat Birliyinin MMTİ-nin rəis müavini vəzifələrində işləyib. 2003-2012-ci illər ərzində özü təsis etdiyi "Euro style" LTD şirkətində çalışıb. Prezidentin 14 aprel 2012-ci il tarixli sərəncamı ilə Bakı şəhəri Sabunçu Rayon İcra Hakimiyyətinin başçısı vəzifəsinə təyin edilib. Apardığımz araşdırmalar nəticəsində bəlli oldu ki, Adil Vəliyevin biznes imperiyasına iri obyektlər daxildir. Belə ki, "Porsche Bakı" mərkəzi, "Audi" və "Wolksvagen" kimi nəhəng avtomobil satışı mərkəzlərinin bu məmura məxsus olduğu bildirilir: "Paytaxtın məşhur şadlıq saraylarından biri hesab edilən "Sarı gəlin" də onun sərəncamında idi. Deyilənə görə, o başçı vəzifəsinə təyin olunandan sonra şadlıq evini yaxın dostlarından birinə bağışlayıb". Əldə etdiyimiz məlumatlara görə, Adil Vəliyev 2012-ci ildən, yəni icra başçısı vəzifəsinə keçəndən bu yana şəxsi varidatını daha da artırıb. Məlumatlı mənbə vurğulayır ki, Sabunçu rayonunun mərkəzi ərazilərini bir növ söküb yenidən quran başçı özünü və yaxın ətrafındakı insanları da yaddan çıxarmayıb: "Onun əmri ilə Bakıxanov qəsəbəsində yol kənarında yerləşən obyektlərin bir neçəsi söküldü. Başçı bu işlərin yolun genişləndirilməsi məqsədilə aparıldığını desə də, sonradan sökülən obyektlərin yerində özünə göydələn ucaltdı. Onun Sabunçu rayonunun ərazisində yerləşən obyektlərinin sayı-hesabı yoxdur. Bakıxanov dəmir yol stansiyasının yaxınlığındakı "AQAT" şadlıq sarayı da başçının biznes şəbəkəsinə daxildir. Bir sözlə, rayon rəhbəri həm özünə, həm də yaxın qohum-əqrabasına mükəmməl şərait yaradıb. Sabunçu sakinləri isə müxtəlif problemlərin əlində aciz qalıblar". Adil Vəliyevin bacısı oğlu Şamil Həsənovun yaşadığı qlamur həyat isə başqa yazının mövzusudur. Ki, bu haqda gələn saylarımızda geniş məlumat verəcəyik. Nəsimi Rayon İcra Hakimiyyətinin başçısı Nəsib Məhəməliyev də ən varlı icra başçılarının sırasında göstərilir. Məlumat üçün bildirək ki, o 11 fevral 1961-ci ildə Balakən rayonunda anadan olub. 1982-1987-ci illərdə Kuybşev Dəmir Yolu Nəqliyyatı Mühəndisləri İnstitutunun Dəmiryol nəqliyyatında "Daşınma prosesinin idarə olunması" ixtisası üzrə, 1991-1995-ci illərdə isə Bakı Dövlət Universitetinin hüquq fakultəsini "hüquqşünaslıq" ixtisası üzrə bitirib. 2006-cı ilin mart ayının 3-dən Nəsimi Rayon İcra Hakimiyyətinin başçısıdır. Mətbuat səhifələrində yazılan tənqidlərdən belə başa düşmək olar ki, Nəsib Məhəməliyev vəzifə səlahiyyətlərindən istifadə edərək qanunsuz torpaq satışı və digər xoşagəlməz işlərlə məşğul olub. Apardığımız qısa araşdırmaların nəticəsində öyrəndik ki, maliyyə imkanları hədsiz dərəcədə geniş olan məmur sahib olduğu kapitalın sayəsində paytaxtın bahalı ərazilərində ticarət obyektləri açmağa müvəffəq olub. Məlumata əsasən, başçının təkcə Nəsimi rayonu ərazisində onlarla ticarət obyekti fəaliyyət göstərir. Hələ bu harasıdır ki. Nəsib Məhəməliyevin "Vorovski"də dəyəri milyonlarla ölçülən imarəti, həyətində bir-birindən bahalı maşınlarının olması da yayılan məlumatlar arasındadır. Həmçinin qeyd etmək lazımdır ki, Nəsimi rayonunun rəhbərinin adı bir neçə dəfə qızıl biznesində çəkilib. Bildirilib ki, paytaxtdakı qızıl satışı mərkəzlərinin bir neçəsi icra hakiminin nəzarəti altındadır. İstənilən halda, vəzifəli şəxslərin özəl sahibkarlıq fəaliyyəti ilə məşğul olması qəbul edilən hal deyil. Adı müxtəlif qalmaqallarda hallandırılan icra başçılarından biri də Gülağa İslamovdur. Nə az nə çox düz 19 ildir ki, Xəzər Rayon İcra Hakimiyyətinə başçılıq edən məmur geridə qalan müddət ərzində saysız-hesabsız qanun pozuntularına imza atıb. Və nəticədə şəxsi sərvətini artırmağa nail olub. Etibarlı mənbələrin redaksiyamıza verdiyi məlumatlarda deyilir ki, Gülağa İslamovun Xəzər rayonunun ayrı-ayrı qəsəbələrində ət kəsimi məntəqələri, çay evləri, kafeləri, əyləncə mərkəzləri, avtomobil təmiri sexləri və avtoyuma məntəqələri var.

Kimin nəyi varsa sağlığına qismət olsun. Amma büdcə pullarına şərik çıxmaqla biznes imperiyası yaratmaq nə dərəcədə doğrudur bunu bilmirik. Görəsən, adları çəkilən icra başçıları bu qədər sərvətə halal pulla sahib çıxıblar, yoxsa?... Kimliyindən asılı olmayaraq, heç bir məmurun dövlət büdcəsinin pullarını mənimsəməyə, daha doğrusu, oğurlamağa haqqı yoxdur. Biz inanırıq ki, vəzifəsinə uyğun olmayan işlər görən, büdcə pullarını öz dədəsinin pulu kimi xərcləyən vəzifə sahibləri gec-tez cinayət məsuliyyətinə cəlb ediləcəklər. \\ gundelik-baku.com \\

Mövzu ilə bağlı hər üç icra başçısının mövqeyini işıqlandıra bilərik.