Bir müddət əvvəl ölkəni tərk edən hüquq müdafiəçisi Mətanət Əzizovanın ailə üzvləri də onun yanına gediblər. Hüquq müdafiəçisinin oğlu Camal və həyat yoldaşı Eldar Əzizov bir neçə gün onun yanında qaldıqdan sonra Bakıya qayıdıblar.

Bu barədə “Yeni Müsavat”a danışan M.Əzizovanın anası, hüquq müdafiəçisi Mirvari Qəhrəmanlı qeyd edib ki, yeznəsi və nəvəsinin ölkədən çıxmasına qoyulan qadağa artıq götürülüb: “Həm diplomatik korpuslar, həm beynəlxalq təşkilatlar, həm özüm bununla bağlı dəfələrlə müraciət etmişdim. Ailəsi də ərizə ilə müraciət etmişdi. Baş prokurora edilən bir neçə müraciətin nəticəsi oldu, nəhayət sanksiyalar götürüldü. Ancaq düşünürəm ki, birdəfəlik olmayacaq”.

M.Qəhrəmanlı deyib ki, M.Əzizova və həyat yoldaşı hazırda ciddi şəkildə müalicə olunurlar: “Mətanət Praqada müalicə olunur. Yeznəm və nəvəm onun yanına getdilər və qayıtdılar. Yeni ildə onların yenidən Praqaya getməsi gözlənilir. Eldar orada həkim müayinəsindən keçəcək”. 

Bununla belə, M.Qəhrəmanlı deyib ki, ailəsi və özü birdəfəlik ölkədən getmək niyyətində deyil: “Heç Mətanət də orada birdəfəlik qalmaq üçün müraciət etməyib. Müvəqqəti olaraq oradadır, bir xarici təşkilat da onu işə götürüb ki, tibbi sığortası olsun və müalicə oluna bilsin. Özümə qaldıqda, heç vaxt ölkəni tərk etmərəm. Ağır günlərim olub, bu altı ayda çəkdiklərimi də heç bir anaya arzulamıram. Ancaq bu ölkə mənim ölkəmdir və buradan çıxıb başqa yerdə yaşamağı ağlıma belə gətirmirəm”.

Hüquq müdafiəçisinin sözlərinə görə, nəvəsi və yeznəsinin ölkədən çıxmasına qoyulan qadağa ilə bağlı Dövlət Sərhəd Xidməti ilə məhkəmə çəkişməsində uduzublar: “İddiamız təmin olunmadı. Yəni onların ölkədən çıxmasına qoyulan qadağa götürülmədi. Məlum oldu ki, bizə sanksiyanı Sərhəd Xidməti yox, Baş Prokurorluq verib. Məhkəmədə onlar göstərdilər ki, dövlət başçısının sərəncamı var və Baş Prokurorluq məhkəmə qərarı olmadan da ölkədən çıxmağa qadağa qoya bilər, sanksiya verə bilər. biz növbəti instansiyaya müraciət etmək istəyirdik. Ancaq sonra diplomatik korpusun nümayəndələrinin, beynəlxalq təşkilatların köməyi ilə müraciətlər ünvanladıq və iki həftə əvvəl sanksiyalar götürüldü. Amma nə qədər müddətə, bunu bilmirik”.