Şəkidə ayı həyət evinə hücum edib. 

Anspress xəbər verir ki, həyətində əsasən meyvə ağaclarının ayı hucumuna məruz qaldığını deyən Fuad Səmədovun sözlərinə görə, onun evi meşəyə yaxın ərazidə yerləşir.

Fuad Səmədov bildirir ki, yaşadığı ərazi meşəyə yaxın olduğundan daim gecələr vəhşi heyvanların səsini eşidirlər. Sakinlər bu vaxtadək heyvanların evlərinə yaxınlaşdığına təsadüf etməyiblər. Lakin bir neçə aydır ki, ayı nəriltisini və onun bu ərazilərdə dolaşdığını hiss edirlər. Bu gecə isə ayı F.Səmədovun həyətinə hucum edərək buradakı əksər ağacları qıraraq məhv edib. Əsasən meyvə ağaclarını hədəf seçən yırtıcı, ağacın əlçatan yerlərində olan meyvələri tamamilə yeyib. Ev sahibinin sözlərinə görə, hər axşam ayının üzünü görməsələr də hənirtisi ətrafı bürüyür. Amma bu yırtıcı ilə qarşılaşmaq təhlükəsi olduğundan həyətə çıxmağa cəsarət etmirlər. Fuad Səmədov deyir ki, axşam hava qaralan kimi uşaqları və nəvələrini həyətə düşməyə qoymur. Çünki ayı ətrafda dolaşdığından hər an onlara hucum etmək təhlükəsi yaranır. Evin xanımı isə daha çox narahatdır. 

”Ayı birinci dəfə həyətə duşəndə uşaqlar onun hənirtisinə yuxudan ayıldılar. Pəncərədən onun hənirtisinə neçə saat qulaq asdıq. Bu gecə saat 3-4 radələrində baş verib. Bizim özümüzü müdafiə etməyə heç nəyimiz yoxdur, qorxuruq ki, birdən hücüm edər. Yay vaxtı pəncərə də açıq olur. Ona görə qorxuruq ki, ayı gəlib evə də hucum edər”, ev xanımı Gülnarə Səmədova bildirdi.

Ev sahibinin sözlərinə görə, silahları olmadığından həyətə çıxmağa çəkinirlər. Daha çox qorxduqları isə ayının evə hucum etməsidir.