"Xəsislik başlayan yerdə kasıblıq bitir". Bu sözlərin müəllifi Onore de Balzakdır. Bakının mərkəzindəki parkinqləri görərkən, həmin sözlərin həqiqi olduğuna inam yaranır.

Bakının mərkəzində həmin parkinqləri tikiblər ki, tıxacları azaltsınlar, insanların həyatları rahatlaşsın. Ancaq sürücülər öz maşınlarını parkinqlərdə saxlamaq istəmirlər. Parkinqlərin çölündəki avtomobillərin sayı içəridəki avtomobillərdən qat-qat çoxdur. Həm də bu avtomobillər adətən bahalı avtomobillər olur. Dəbdəbəli maşınların sahibləri parkinqə pul ödəməkdənsə, "stayanşik"ə qəpik-quruş verməyi üstün tuturlar.

"Range Rover", "Porsche", "BMW" və "Jaguar" kimi maşınların sahiblərindən nəyə görə maşını yolu kənarında saxladıqlarını soruşanda başlayırlar həyatın çətinliklərindən, parkinqin baha olmağından söz açmağa. Ancaq maşına bir cızıq düşərkən, onlara dəyən ziyandan danışmağa çəkinmirlər. Həm də bu ziyanın məbləği iki sıfırlı rəqəmlərlə hesablanır.

Nəticədə bu qənaətcil sürücülər yollardakı bərbad vəziyyətin səbəbkarlarından biri olurlar.