İyulun 19-da  Türkiyənin Anadolu Dövlət Universitetinin, Türkiyənin Azərbaycandakı səfirliyinin və Azərbacan-Türkiyə İş Adamları Birliyinin birgə təşkilati dəstəyilə "Azərbaycanda milli mətbuatın yaranmasının 143 illiyi" münasibətilə tədbir keçirilib.

Mediatv.az-ın  məlumat verir ki, Anadolu Universitetinin İKT xidmətləri göstərən Tərəfdaş Qurumunun binasında başlanan tədbirdə universitetin rektoru Naci Gündoğan, Türkiyənin Azərbaycandakı səfiri Erkan Özoral, mətbuat nümayəndələri iştirak ediblər.

Tədbirdə çıxış edən rektor Nacı Gündoğan mətbuat nümayəndələrini peşə bayramları münasibətilə təbrik edib.

Rektor bildirib ki, Anadolu Universiteti 60 illik tarixə malik dövlət universitetidir və bugünədək həmin universitetdən 5 müstəqil ali təhsil ocağı əmələ gəlib, hər biri də  ayrıca fəaliyyət göstərməkdədirlər.

9 ildir Azərbaycanda fəaliyyət göstədiklərini deyən rektor qeyd edib ki, Anadolu Universiteti Azərbaycanın bir neçə universiteti ilə əməkdaşlıq edir.

Azərbaycan-Türkiyə münasibətlərindən söz açan N.Gündoğan deyib ki, bu əlaqələrin sıxlığı tək sözdə deyil, həqiqətdədir.

Daha sonra çıxış edən Türkiyənin Azərbaycandakı səfiri Erkan Özoral mətbuat nümayəndələrini təbrik edərək söyləyib ki, Anadolu Universiteti ən köklü, dünyada ən çox tələbəyə malik olan ali məktəbdir.

Sonra iştirakçılar universitetin “Məsafəli təhsilin texniki bazası” ilə tanış olublar.