Milli Məclisin bu gün keçirilən iclasında təhsil naziri Mikayıl Cabbarov 2015-ci il büdcə layihəsinin müzakirəsi zamanı təhsil sahəsindən şikayətlənən və Təhsil Nazirliyinə təkliflər verən deputatların fikilərinə münasibət bildirib. 

Nazir bildirib ki, müəllimlərin maksimal dərs yükü 36 dərs saatına bərabər ola bilər: “Bu da onların öz istəyi ilə müəyyən edilir. Onların əmək haqlarına gəldikdə isə bu göstərici 12 saat üçün minimal 155, maksimum isə 207 manata bərabərdir”

Nazir həmçinin rayon və kənd məktəblərində vakant yerlərlə bağlı məsələyə də toxunub. Onun sözlərinə görə, respublikanın kənd və rayonlarında vakant say 3 faizdən 1 faizə enib: “Bu da onu göstərir ki, gənc müəllimlərin ucqar ərazilərimizdə işləməsinə həvəsləndirilmək üçün hökumətin apardığı işlər öz müsbət təsirini verir.”

Daha sonra müəllimlərin sayından danışan təhsil naziri qed edib ki, əvvəllər Azərbaycanda 1 müəllimə 8 şagird düşürdü: “Görülən tədbirlər nəticəsində bu göstərici respublikada 1 müəllimə 9 şagird, Bakıda isə 1 müəllimə 12 şagird düşür.Hazırda Azərbaycanda 151 min müəllim fəaliyət göstərir”.

M.Cabbarov müəllimlərin nüfuzundan danışıb: “Bütün müəllim ixtisaslarına ali təhsil müəssisələrində qəbul balları qaldırılır. Bu da müəllimin nüfuzunun artmasına öz müsbət təsirini göstərəcək”,-deyə nazir əlavə edib.

Nazir bildirib ki, təhsil sektorunda 151 min müəllim faliyyət göstərir. Yeni müəllimlərin bu peşəyə gətirilməsi üçün bir sıra həvəsləndirici layihələr həyata keçirilir: “ Sevindirici haldır ki, son illər qəbul göstəricilərində müəllimlik ixtisasına daxil olanların qəbul ballarının artırılması müəllim nüfuzunun qaldırıması yönündə öz müsbət nəticələrini verməkdədir. Biz eyni zamanda Müdafiə Nazirliyi ilə birlikdə işlər həyata keçiririk. Sərhədyanı bölgələrdə əsgərlərlə görüşlər həyata keçiririk. Müdafiə Sənayesi Nazirliyi ilə birlikdə həyata keçirdiyimiz işlərin böyük əhəmiyyəti var. Çalışırıq ki, məhz Azərbaycan Müdafiə Sənayesi Nazirliyinin istehsal etdiyi vasitələrlə fənn kabinetlərini təmin edək. Daha 50 məktəbdə hərbi hazırlıq kabineti həmin vasitələrlə təmin olunacaq”.

Peşə təhsilinə gəlincə isə nazir deyib ki, hazırda Dünya Bankı ilə bir layihə üzərində danışıqlar aparılır:” Ümid edirəm ki, layihənin müsbət həllinə nail olacağıq. Üzü qalın qabıqlı kitabların çap olunması ilə bağlı deyilənlərlə də razılaşmıram. Məsələn, 6-7 ci siniflərin şagirdləri artıq öz dərslərini elektron resurslardan istifadə edərək oxuya bilərlər”.