Erməni məmurların Qarabağa qanunsuz səfərləri: - Nə etməliyik?

Ana səhifə Bizimlə əlaqə

8 müqavilə, 24,5 milyon manat - Tender kralı "ZN Trade" MMC kimindir?

SABİQ NAZİRİN “TENDER KRALI”NA ÇEVRİLƏN ŞİRKƏTİ

Sumqayıtı "yaşıllaşdıran" Nuranə Zeynalova kimdir?

Naxçıvan İTS-də maliyyə pozuntusu - Pullar hara xərclənib?

Baba Tağıyev şirkətində aparılan yoxlamaya mane olub?

"Grand Palace"nın sahibi səkini yola çevirdi

İspaniya mediası Eldar Mahmudovun oğurluq pullarından yazdı

Tenderlər qalibi olan “Dostluq H-EL” MMC hansı GENERALINDIR?

“EuroHome”-nin sahibi kompensasiya verməmək üçün hansı yola əl atıb?

Siyasət (9-02-2021, 17:00)
Erməni məmurların Qarabağa qanunsuz səfərləri: - Nə etməliyik?

Rəsmi Bakının müxtəlif müstəvilərdə erməni məmurların Dağlıq Qarabağa səfərləri ilə bağlı sərt və qəti xəbərdarlıq etməsinə baxmayaraq hələ də bu cür səfərlər davam etdirilir. Bu dəfə Ermənistanın baş prokuroru Artur Davtyan Azərbaycanın separatçıların nəzarəti altında olan Qarabağ bölgəsinə qanunsuz səfərə gəlib. O, Xankəndində separatçı rejim qalıqlarının başçısı Araik Arutyunyanla görüşüb.

Erməni tərəfinin bu addımı növbəti dəfə Azərbaycan, Rusiya və Ermənistan liderlərinin imzası ilə təsdiqlənmiş üçtərəfli bəyanatın müddəalarının kobud şəkildə pozulmasıdır. Azərbaycanın beynəlxalq səviyyədə tanınan ərazisinə, eyni zamanda 44 gün davam edən və Ermənistan üçün biyabrçı məğlubiyyətlə nəticələnən müharibədən sonra bu ölkənin hansısa məmurunun Qarabağa səfəri rəsmi İrəvanın hüquqa zidd və riyakar siyasətinin davamı kimi qiymətləndirilir.

Bəs erməni məmurların bu səfərləri nədən xəbər verir?

Məsələ ilə bağlı "Mediatv.az" a açıqlama verən hərbi ekspert Ədalət Verdiyev bildirdi ki, bu, erməni nazirlərin Qarabağa olan ilk səfəri deyil:

“Müharibədən sonrakı dövrdə yeni təyin olunan Ermənistan XİN başçısı da belə bir addım atmışdı. O zaman da Azərbaycan hökuməti, hərbi-siyasi rəhbərliyi, həmçinin XİN bu barədə öz sərt fikirlərini bildiriblər. Görünür, səslənən bəyanatlardan Ermənistan tərəfi doğru nəticə çıxarmaq niyyətində deyil. Onların bu səfərləri Azərbaycan tərəfi ilə mütləq razılaşdırılmalı olduğu Ermənistan rəhbərliyinin diqqətinə çatdırılıb. Əgər Azərbaycanla razılaşdırılmayıbsa və sülhməramlılar da belə bir səfərin baş tutmasına şərait yaradıblarsa, o zaman mütləq bu addımın qarşısının alınması üçün adekvat addımlar atılmalıdır. Buna həmin ərazilərə giriş-çıxışın birbaşa bizim, yəni Azərbaycan əsgərinin tərəfindən həyata keçirilməsi də daxil ola bilər”.

Mövzunu şərh edən politoloq İlqar Vəlizadə vurğuladı ki, bu səfərləri aradan qaldırmaq lazımdır:

“Səfərlərlə bağlı ümumiyyətlə hansısa qərar qəbul olunmalıdır. Qərarda isə Azərbaycan, əlbəttə, əsas tərəfdir. Bu Rusiyaya bildirilməlidir. Çünki Rusiya sülhməramlıları regionda məskunlaşıb, fəaliyyətdədir. Ona görə də bu məsələ Rusiya tərəfi ilə ayrıca danışılmalıdır. Burada müzakirə olunası bir şey yoxdur. Sadəcə olaraq Azərbaycan öz mövqeyini bir daha Rusiya tərəfinə göstərməlidir. Sülhməramlılar müvəqqəti buradadır və bu funksiyanı yerinə yetirməlidir. Geci-tezi onlar getməlidirlər. Ondan sonra Laçın istiqamətində olan sərhəddə Azərbaycan sərhədçiləri tam fəaliyyət göstərməlidir. Ona görə də bu get-gəl məsələsi həll olunmalıdır. Azərbaycan tərəfi bu əraziyə nəzarəti öz üzərinə götürdükdən sonra bütün hallarda bu səfərlərin arasını kəsəcəyik. Ona görə də indidən həm regionu, həm erməni tərəfini indidən hazırlaşdırmaq lazımdır ki, bu səfərlərə son qoyulsun. Digər tərəfdən humanitar dəhliz fəaliyyətdədir. Fəaliyyətdə olması o demək deyil ki, humanitar dəhlizdən kim necə istəyir hərəkət etsin. Bu belə deyil. Yəni humanitar dəhlizdən yalnız Qarabağda yaşayan erməni sakinləri yaxud da onların yaxın qohumları istifadə edə bilərlər. Amma bu o demək deyil ki, erməni rəsmiləri Dağlıq Qarabağa istədiyi vaxt gələ, hansısa tədbirlər həyata keçirə, iştirak edə bilərlər”.

Bakı Politoloqlar Klubunun sədri Zaur Məmmədov isə qeyd etdi ki, Ermənistan siyasətçiləri özlərini aldatmaqla məşğuldurlar:

“Onların hansı səfərlər, hansı bəyanatlar verməsindən asılı olmayaraq bundan əvvəl də Azərbaycan tərəfi Ermənistana dəfələrlə xəbərdarlıq edirdi. Və dediyini etdi. Bundan sonra da edəcəkdir. Qarabağ Azərbaycan torpağıdır. Xankəndi də həmçinin. Tezliklə orada Azərbaycan bayrağı dalğalanacaq. Sadəcə olaraq, bu siyasətçilər erməni xalqını öz şəxsi ambisiyalarına görə qurban verirlər. Qarabağdakı erməniləri, həm də erməni xalqını aldatmaqla məşğuldurlar. Ermənistandan kimin Dağlıq Qarabağa getməsindən asılı olmayaraq fakt ondan ibarətdir ki, bu ərazilər Azərbaycanındır. Və onların da bu gediş-gəlişləri uzun sürməyəcək. Tezliklə bütün bunlara son qoyulacaq. Digər tərəfdən gəlib-getmələr, konfrans, toplantılar bunların heç bir nəticəsi olmayacaq. Uğursuz erməni siyasətçilərinin 30 il ərzində apardıqları siyasətin hansı nəticələrə gətirdiyini çox yaxşı gördük”.