Türkiyənin 61-ci hökumətinin baş naziri Rəcəb Tayyub Ərdoğanla haqqında rüşvət və sənəd saxtalaşdırmaq ittihamları ilə başladılan istintaq əsas göstərilərək Məclis İstintaq Komissiyası açılması tələb edilib. “Mediatv.az” xəbər verir ki, bu barədə Türkiyənin “Zaman” qəzeti yazıb. 

Belə bir tələb CHP-li millət vəkili Fikri Sağların imzası ilə Məclisə təqdim edilib. Təqdim edilən sənədlərdə o vaxtki baş nazir Ərdoğanın oğlu Bilal Ərdoğanın da aralarında olduğu şübhəlilər haqda oxşar ittihamlarla bağlı çıxarılan hakim qərarlarının tətbiq edilməməsi vurğulanır. 

17 və 25 dekabr istintaqlarının gedişində Ərdoğanın vəzifə səlahiyyətlərindən istifadə edərək cinayətləri ört-basdır etməsi Məclisə təqdim edilən tələblərdə öz əksini tapıb. 

Ərdoğanın istintaqa cəlb edilməsi üçün hazırda tətilə çıxan TBBM-in 110 millət vəkilinin imzası əsasında toplanması lazım gələ bilər. 131 deputata sahib CHP isə bu prosesi təkbaşına həyata keçirə bilər. 

Əgər istintaq başladılmasına qərar verilərsə Məclisdə 15 nəfərdən ibarət İstintaq Komissiyası yaradılacaq.