Nəqliyyat naziri Ziya Məmmədovla AZAL prezidenti Cahangir Əsgərovun kompromat savaşı davam edir. Nazirin baş pilota qarşı açdığı savaş hava limanına marşrut xətti buraxmamaqla müşayiət olunur. Tia.az-a verilən məlumatda qeyd edilir ki, uzun müddətdir Bakı aeroportuna marşrut xətti açılması müzakirə edilir.

Nəqliyyat şefi isə AZAL rəhbəri ilə çəkişməsinə görə buna icazə vermir. Bir müddət əvvəl 16 nömrəli avtobus xəttə buraxılsa da, sonra ləğv edildi. Məlumatda bildirilir ki, hava limanına yalnız taksi ilə getmək mümkündür. Bu da sərnişinlərə baha başa gəlir. AZAL rəhbərliyi marşrut xətti açılmasına çalışsa da, buna nail ola bilmir.
Mənbə qeyd edir ki, Ziya Məmmədovla Cahangir Əsgərovun savaşı köhnə vaxta gedib çıxır. Halbuki Milli Məclisdən tutmuş Nəqliyyat Nazirliyinə qədər marşrutla bağlı bu çətinliyin aradan qaldırılacağına vəd verilib. Ancaq əhaliyə verilən söz elə söz olaraq qalıb. Söhbət ondan gedir ki, Binə hava limanına bir avtobus belə işləmir.
Z.Məmmədov hava limanını da nəzarətə götürmək muradına çatmayıb deyə belə qadağaya əl atıb. İndi marşrutlar Mərdəkan dairəsindən o yana getmir. Nəticədə sərnişinlər Mərdəkan dairəsindən aeroporta qədər olan 3-4 kilometrlik məsafəni taksi ilə qət etməli olurlar.