Mənzil-Kommunal Təsərrüfatı Departamenti sədrinin səlahiyyətləri əlindən alındı; onu MTN işinə görə həbsdə yatan Vidadi Zeynalovla birləşdirən məqamlar var 

Bakı Şəhər İcra Hakimiyyətinin başçısı Eldar Əzizov paytaxtın Mənzil-Kommunal Təsərrüfatı Departamentinin sədri Rəfael Mehralıyevin səlahiyyətlərini əlindən alıb. Unikal.org xəbər verir ki, E.Əzizov Bakı Şəhər Mənzil-Kommunal Təsərrüfatı Departamentinin sədrinin səlahiyyətlərini meriyanın tikinti məsələləri şöbəsinin müdiri Rəşid Ağayevə həvalə edib.

E.Əzizovun bu qərarı verməsinə səbəb departamentin özündə və tabeçiliyində olan qurumlarda rüşvət və korrupsiya faktları aşkarlanması, paytaxtın bəzi dövlət obyektlərinin tikintisi, yenidən təmiri zamanı baş vermiş korrupsiya faktlarının üzə çıxmasıdır. Mənzil Kommunal Təsərrüfatı İdarəsinin fəaliyyət dairəsi kifayət qədər genişdir. Bura yol çəkilişi, məktəb və uşaq bağçaları, eləcə də digər sosial obyektlərin tikintisi və təmiri daxildir. Ümumiyyətlə, mənzil kommunal təsərrüfatı sahəsinə büdcədən kifayət qədər böyük həcmdə vəsait ayrılır.

Musavat.com bildirir ki, Rəfael Mehrəliyevin Bakı Şəhər Mənzil-Kommunal Təsərrüfatı Departamentinin rəisi postuna gətirilməsi bu yaxınlarda həbsdən buraxılan Rabitə və Yüksək Texnologiyalar  Nazirliyinin sabiq aparat rəhbəri Vidadi Zeynalovun ciddi dəstəyi ilə olub. R.Mehrəliyev dəfələrlə V.Zeynalovla qohumluğunu inkar etməyə çalışıb. Bildirilir ki, BŞİH-də departament rəisinin qardaşı, Naftalanın polis rəisi işləmiş polkovnik Mübariz Mehralıyev V.Zeynalovun yeznəsidir.

Aparat rəhbərinin həbsindən dərhal sonra mətbuat səhifələrində Rəfael Mehrəliyevin də bilavasitə iştirak etdiyi bir çox irimiqyaslı maxinasiyalar barədə informasiyalar yayılmağa başladı. Hətta bildirilirdi ki, həbsinə qədər bu departament V.Zeynalovun təsir dairəsində olub, bu sahəyə ayrılan büdcə vəsaitlərinin xərclənməsinə qeyri-rəsmi olaraq məhz sabiq aparat rəhbəri nəzarət edib.

Mediadakı araşdırmalardan belə məlum olur ki, V.Zeynalov Bakı Şəhər Maliyyə İdarəsinin rəisi işləyərkən Bakı Şəhər Mənzil Kommunal Təsərrüfatı İdarəsinin maliyyə şöbəsinə yeznəsinin qardaşı Rəfail Mehralıyevi təyin etdirib. Məhz qohumunun bilavasitə iştirakı ilə Bakının mənzil kommunal təsərrüfatı sahəsinə qeyri-rəsmi nəzarət edilib. V.Zeynalov nazirliyə gətiriləndən sonra o, Rəfael Mehralıyevi Bakı Şəhər Mənzil Kommunal Təsərrüfatı Departamentinə rəis təyin etdirib. O da bu vaxtadək işində qala bilib. Mənbə iddia edir ki, Bakı Şəhər İcra Hakimiyyətinin Mənzil Kommunal Təsərrüfatı Departamentinin rəisi Rəfael Mehralıyev əsasən V.Zeynalovun göstərişlərini yerinə yetirib. Vidadi Zeynalov da Rabitə Nazirliyində otura-otura MKT-yə ayrılan pulların idarə olunmasında birbaşa iştirak edib. Rəfael Mehrəliyevin Türkiyədə özünün və yaxın adamlarının adına biznesi olması xəbəri də yeni deyil.  

Gözlənilir ki, yaxın günlərdə Bakı Şəhər Mənzil Kommunal Təsərrüfatı Departamentində köklü kadr islahatları aparılacaq. Rəfael Mehralıyev və ona yaxın işçilər, MİS rəisləri vəzifədən uzaqlaşdırılacaq.

Musavat.com