“Türkiyə bu ilin iyul ayında çətin bir sınaqdan şərəflə çıxdı”.

Mediatv.az xəbər verir ki, bunu Azərbaycan Respublikasının Prezidenti İlham Əliyev İstanbulda keçirilən 23-cü Dünya Enerji Konqresindəki çıxışında deyib.

Dövlət başçısı bildirib ki, Türkiyə xalqı Prezident Rəcəb Tayyib Ərdoğanın ətrafında sıx birləşərək böyük qəhrəmanlıq göstərdi: “Onlar Türkiyədə hərbi çevrilişə cəhdin qarşısını aldılar, dövlətçiliyini qorudular. Bundan başqa, Türkiyənin xoşbəxt bu gününü və gələcəyini qurdular. Biz Azərbaycanda sizinlə fəxr edirik”.
Prezident İ.Əliyev qeyd edib ki, Azərbaycan bütün ölkələrlə bərabər hüquqlu, qarşılıqlı mənfəət və maraqlar əsasında əlaqələr qurur: “Bu gün biz çox sevinirik ki, Türkiyə uğurla, inamla irəli gedir və “Böyük 20-lər”in üzvüdür. Azərbaycan-Türkiyə əlaqələrinin hansı səviyyədə olduğunu göstərmək üçün sadəcə bir faktı deyim. “Böyük 20-lər”in keçən ilin noyabr ayında Antalyada keçirilən zirvə görüşünə Türkiyə kluba üzv olmayan bir ölkəni qonaq kimi dəvət edə bilərdi. Türkiyə məhz Azərbaycanı dəvət etdi. Buna görə də bir daha sizə minnətdarlığımı bildirirəm. Bu il dördüncü dəfədir ki, Türkiyəyə səfər edirəm. Əziz qardaşım, Rəcəb Tayyib Ərdoğan da Azərbaycana səfərlər edir, bizim dostluğumuz, birliyimiz, qardaşlığımız daimi, əbədi və sarsılmazdır”.