Azərbaycan prezidenti İlham Əliyevin tranzit yük daşıyan TIR-lardan yol vergisinin tutulmasının 3 illiyə dayandırılmasına dair sərəncamından sonra Ermənistanın tranzit potensialından istifadəyə olan bütün ümidlər boşa çıxıb.

Mediatv.az  Virtualaz.org-a istinadən xəbər verir ki, Ermənistan nəqliyyatçıları Azərbaycanın bu qərarından sonra Rusiyaya və geriyə yük daşıyan İran TIR-larının Ermənistan ərazisindən istifadəsinin tamamilə səmərəsiz olduğunu deyirlər. 168.jam qəzetinin yazdığına görə Ermənistan ərazisindən tranzit keçən İran TIR-ları 300 dollardan çox yol vergisi ödəyirlər. Geriyə qayıdanda da həmin məbləği ödəmək lazımdır. “Lakin sual yaranır-niyə? Biz onlara nə təqdim edirik? Yaxşı xidmət, yoxsa infrastruktur, keyfiyyətli yol? Heç biri. Üstəlik biz yol vergisi tətbiq etmişik və bu da Ermənistan ərazisindən istifadəni cəlbedici etmir. Azərbaycan bunu dərhal başa düşdü və yol vergisini ləğv etdi. Gürcüstan isə cəmi bir istiqamətdə yol vergisi alır, özü də 80 dollar. İndi bütün bunlardan sonra Ermənistan necə rəqabətə girə bilər?” - qəzet yazır.

Ermənistan nəqliyyatçıları etiraf edirlər ki, Azərbaycanın yol vergisini ləğv etməsindən sonra İran maşınları sadəcə olaraq Ermənistana gəlməyəcəklər. Əgər Ermənistanda kimsə İran TIR-ı görsə deməli o, Ermənistan üçün yük gətirib. Beynəlxalq yükdaşımalarla məşğul olan “Apaven” şirkətinin rəhbəri Qaqik Ağacanyan təsdiq edib ki, İran maşınları Ermənistandan tranzit kimi istifadə etmir. Onun sözlərinə görə, apreldə Moskvada nəqliyyatçıların iri toplantısı olmuşdu və orad deyilmişdi ki, Ermənistan İranla Rusiya arasında yükdaşımalarda tranzit bağa çevrilə bilər. Ancaq yol vergisi səbəbindən bu marşrutdan istifadə sərfəli deyil.

Qeyd edək ki, Ermənistan nəqliyyat blokadasından çıxmaq üçün dəmiryollarını İrana birləşdirməyə can atırdı. Lakin Azərbaycan, Rusiya və İran arasında “Şimal-Cənub” nəqliyyat dəhlizinin istifadəyə verilməsinin sürətləndirilməsinə dair əldə edilmiş razılaşmalar bu ümidləri də boşa çıxardı. Azərbaycan strateji qərar verərək bu dəhlizin İran hissəsinin tamamlanması üçün bu ölkəyə 500 milyon dollar kredit ayırıb. İlin sonuna qədər “Şimal-Cənub” dəhlizinin işə salınması nəzərdə tutulur və bundan sonra Ermənistanın regional nəqliyyat dəhlizlərindən tamamilə kənarda qalmaqdan başqa variantı olmayacaq.