Dünən Londonda həbs olunan OPEK prezidenti Diezani Elison Madueke zaminə buraxılıb. Ölkədən çıxa bilməməsi üçün Maduekenin pasportu əlindən alınıb.

Mediatv.az xəbər verir ki, bu barədə TVC News kanalı Londondakı Charring Cross polis bölməsinə istinadən məlumat yayıb.

Maduekenin həbsi barədə dünən gecə saatlarında xəbər verilib. OPEK rəhbəri rüşvətdə və çirkli pulların yuyulmasında ittiham olunur. Onunla birlikdə daha dörd nəfərin saxlanıldığı bildirilir. 
Elison Madueke OPEK rəhbərliyinə bu ilin yanvarında gətirilib.

Ona qədər isə xanım Madueke Nigeriyada neft naziri postunu tutub. Elə həbsi də nazir işlədiyi vaxtlarda yol verdiyi qanunsuzluqlarla bağlıdır. Hələ nazir vəzifəsində ikən Maduekenin adı milyonlarla dövlət vəsaitini mənimsəməkdə, özünə şəxsi təyyarələr alaraq büdcənin pullarını israf etməkdə hallandırılırdı.

2009-cu ildə Nigeriya senatı 6 milyon dollarlıq iş üzrə ona ittihamlar irəli sürmüşdü.
Bu ilin mayında isə Nigeriyaya yeni seçilən prezident Məhəmməd Buxari söz verdi ki, neft şirkətindən oğurlanan milyardları ölkəyə qaytaracaq və günahkarları məsuliyyətə cəlb edəcək.