Ağ Ev Rusiyanı aviazərbələrin hədəflərini düzgün seçməyə və yalnız İŞİD-in mövqelərini bombalamağa çağırıb. 

Mediatv.az  xəbər verir ki, bu açıqlama ilə Ağ Evin sözçüsü Coş Ernest çıxış edib. Ernest bildirib ki, iki ölkə arasındakı anlaşmada amerikalı təyyərəçilərin təhlükəsizliyi xüsusi qeyd olunub. 

C.Ernest qeyd edib ki, dünən Pentaqonla Rusiya Müdafiə Nazirliyi arasında bir saat davam edən videokonfrans təşkil edilib: «Rusiya təyyarələrinin İŞİD-in olmadığı rayonları bombalaması bizi narahat edir. Bu rayonlarda Əsədə müxalif olan və Qərbin dəstəklədiyi qüvvələr var".

Ağ Evin sözcüsü bu cür yanaşmanın Rusiyanın özünə zərər verəcəyini bildirib. Onun sözlərinə görə, bu, Suriyada münaqişəni bir az da dərinləşdirə və həllini uzada, həmçinin Rusiyanı tərəf kimi bu münaqişəyə cəlb edə bilər.

Qeyd edək ki, Rusiya tərəfi ABŞ-ın bu iddalarını qəbul etmir və hərbi təəyarələrin İŞİD-in mövqelərini bombaladığını bildirir.

Məsələyə Rusiya prezidenti Vladimir Putin də münasibət bildirib. Putin deyib ki, bu məlumatlar informasiya hücumudur və Rusiya bu hücumlara hazırdır. Onun sözlərinə görə, Rusiya təyyarələri hələ havaya qalxmamış bu cür xəbərlər yayılmağa başlayıb.