Aralıq dənizindəki axtarış qrupu bildirir ki, onlar Liviya sahilində batmış təxminən 600 nəfəri daşıyan qayıqdan daha çox insanı xilas edəcəklərinə ümid etmirlər.

Rəsmilər yüzlərlə insanın boğulmuş ola biləcəyini bildirib, lakin BMT qaçqınlar agentliyi (UNHCR) bildirir ki, 400 nəfər xilas edilib.

İtaliya sahil mühafizə xidmətinin verdiyi məlumata görə, indiyədək 25 cəsəd tapılıb, lakin nə qədər adamın itməsi barədə məlumat yoxdur.

Hadisə çərşənbə günü miqrant dolu balıqçı qayığının pis hava şəraitində Liviya sahillərindən 25 km aralanmasından sonra baş verib.

İtaliya sahil mühafizə xidmətinin komandiri Filippo Marini bildirib ki, xilas olanların sözlərinə görə, dənizdə çevrilərkən qayıqda 400 və 600 arası insan olub.

UNHCR sözçüsü Melissa Fleming-in sözlərinə görə, təxminən 100 nəfər qayığın gövdəsində səyahət edib və “qayıq çox sürətlə çevrilib”.

2015-ci ildə Aralıq Dənizini keçərək Avropaya gəlmək istəyən 2000-dən çox miqrantın öldüyü deyilir.