"Güney Azərbaycanın tarixi mərkəzi olan Təbriz şəhərinin "Səhənd" stadionunda təbrizlilərin sevimli futbol komandası "Traxtur" ilə İsfahanın "Sepahan" komandası arasında keçirilən görüşdə Azərbaycan və Türkiyə bayraqlarını qaldıran iki güneyli soydaşımızın İranın güc strukturları tərəfindən qondarma "pantürkist" damğasıyla həbs edilməsi tamamilə hüquqazidd davranışdır".
Bu barədə "Sherg.az"a açıqlamasında Azərbaycan Həmrəylik Komitəsinin sədri Əlisahib Hüseynov deyib. Ekspert bildirib ki, eyni zamanda azərbaycanlı tərəfdarların "Traxtur" komandasını dayanmadan alqışlamalarına qəzəbli reaksiya verən farsdilli istifadəçilərin Təbrizin komandasına rəğbəti ifadə edən videonun silinməsi üçün şikayət kampaniyası başlatması da qeyri-adekvat və irqçi yanaşmadır:

"Fars-molla rejiminin yürütdüyü panfarsist, paniranist siyasət İranın farsdilli vətəndaşlarında qeyri-fars mənşəli xalqlara, o cümlədən Güney Azərbaycan türklərinə qarşı dözümsüz və aqressiv münasibətin formalaşmasına səbəb olub. Azərbaycanın İranla münasibətləri normallaşdırmağa çalışdığı bir vaxtda, futbol stadionunda Azərbaycan və Türkiyə bayraqlarının qaldırılmasına və Azərbaycan dilində şüarların səsləndirilməsinə İranın müvafiq rəsmi qurumlarının sərt reaksiya sərgiləməsi səmimi qonşuluq prinsiplərinə ziddir. İran hökuməti stadionda bayraq qaldıran sıravi gənclərə qarşı yox, İsrailin Azərbaycandakı səfirliyinin vurulmasına açıq çağırış edən Cəlal Rəşidi Koçi kimi avantürist deputatlara qarşı sərt tədbirlər görməlidir".