14 saylı cəzaçəkmə müəssisəsində dünyasını dəyişmiş məhkum Elşad Babayevin bacısı Simuzər Babayevanı baş prokurorun 1-ci müavini Rüstəm Usubov qəbul edib. S.Babayeva də eyib ki, qəbulda Baş Prokurorluğun  istintaqa nəzarət şöbəsinin rəisi Nazim Abbasov, Bakı şəhər  prokurorunun müavini Azər Əsgərov və Qaradağ prokurorluğunun müstəntiqi Eyyub Bəşirov iştirak ediblər: “Mən Rüstəm Usubovu dinlədim. O dedi ki, yanarın 10-da iş üzrə 309-cu (vəzifə səlahiyyətlərini aşma) maddəsi ilə cinayət işi başlayıblar. Gördükləri işlərdən danışdı. Dedim ki, o maddə ilə cinayət işinin araşdırılmasına razı deyiləm.  Qardaşım döyülərək öldürülüb və Cinayət Məcəlləsinin qəsdən adam öldürmə (120) maddəsi ilə cinayət işi başlayıb onu öldürənlər cəzaya çatdırılmalıdır. Mənim qardaşımı dekabrın 13-də vəhşicəsinə döyüblər. Dekabrın 22-nə qədər onu ac-susuz saxlayıblar, həkim çağırmayıblar. Qardaşım aldığı xəsarətlərdən ölüb. Əgər bunu mən adi bir vətəndaş kimi qavraya bilirəmsə, deməli, sizlər də bunu yaxşı qavrayırsınız. Bu sizin ilk işiniz deyil ki, kənardan kiminsə fikrinə ehtiyacınız olsun”.

S.Babayeva bildirdi ki, R.Usubov istintaqın gedişatı ilə bağlı ona məlumat veriləcəyini söyləyib: “Bu hadisədən sonra cəzaçəkmə müəssisəsindən azad olunan vəkil Qurban Məmmədovun niyə dindirilmədiyini soruşdum. Müstəntiqə tapşırıldı ki, çağırılıb ifadəsi alınsın. Rüstəm Usubov müvafiq göstərişlər verdi. Mən qardaşımı öldürən şəxslərin ictimaiyyətin gözü qarşısında cəzalandırılmasına nail olacağam. Mən geri çəkilən deyiləm”.

Qeyd edək ki, dekabrın 30-da 14 saylı cəzaçəkmə müəssisəsindən əfv fərmanına əsasən azad olunan Q.Məmmədov E.Babayevin döyülərək öldürüldüyü haqda mətbuata açıqlama verib. Vəkil deyib ki, dekabrın 22-də səhər 9 radələrində  çəzaçəkmə müəssisəsinə 1 dustağın döyülərək öldürülməsi haqda xəbər yayılıb. “Bu hadisəyə etiraz oldu. Təəssüf ki, məhkumlar etiraz hüquqlarından kənara çıxdılar. Növbətçi hissəyə hücum oldu, nəzarətçilər döyüldü. Eşitdiyim, bildiyim məlumatlar var. Bu cinayət ört-basdır edilə bilməz. Bəli, orada qanun pozulub. Lakin bu bir məhbusun döyülərək, işgəncə verilərək öldürülməsinə görədir. Dövlət buna diqqət etməlidir. Yəni məhbuslar orada etiraz vəziyyəti yaratmaq istəyi ilə qalxmayıblar. Ona görə də etiraza qalxan məhbuslara münasibətdə dövlət  humanist olmalıdır” - deyə Q.Məmmədov bildirib. 

Q.Məmmədov deyib ki, etirazdan sonra 11 dustaq Vərəmli Məhkumlar üçün Müalicə Müəssisəsinə köçürülüb. Qalanları isə 14 saylı cəzaçəkmə müəssisəsinin karsındadır: “Tubzon”dan qayıdanlar orada dəhşətli hadisələrin yaşandığını danışırlar. Bu məsələ ictimaiyyətin diqqətində olmalıdır. Ora ictimaiyyət nümayəndələrinin iştirakı ilə baxış keçirilməlidir. Məhkumlar Araz Quliyev, Miryusif Seyidovun ağır durumda olduğu bildirilir. Ora gedib araşdırma aparılmalıdır. Onlar ölüblər, yoxsa qalıblar, müəyyən olunmalıdır”.

Qeyd edək ki, dekabrın 22-də 14 saylı cəzaçəkmə müəssisəsində məhkumlar qiyama qalxıb. Buna səbəb isə məhkum Elşad Babayevin karsda (cəza kamerası) işgəncə ilə öldürülməsi olub. Öldürülən məhkumun yaxınlarının təqdim etdikləri fotolarda E.Babayevin bədəni üzərində çoxsaylı xəsarətlərin olduğu görünür.