Vətən müharibəsi iştirakçısı, Bakı Dövlət Universitetinin 2019-cu il məzunu Vüsal Mahir oğlu Qarayev kəsirləri olduğu üçün diplom ala bilməyib. Bu səbəbdən V.Qarayev həqiqi hərbi xidmətə yollanıb. Xidmət müddəti zamanı Vətən müharibəsi başladığı üçün 1,6 il deyil, 2 il xidmətdə olub.
Talış və Suqovuşan istiqamətində gedən döyüşlərdə iştirak edib. Prezident İlham Əliyevin sərəncamı ilə Laçının və Suqovuşanın azad olunmasına görə medalları ilə təltif edilib.
Bu barədə Axar.az-a danışan V.Qarayev bildirib ki, psixoloji və maddi vəziyyəti yenidən universitetə qayıtmağa imkan vermir:
“Anam qızıl yel xəstəsidir. Atam yoxdur. İşləmək üçün diplom almalıyam. Lakin nə maddi vəziyyətim, nə də müharibədən sonra davam edən psixoloji gərginliyim universitetə qayıtmağıma imkan verir. Müharibədən sonra Laçın rayonunda 7 ay xidmətdə oldum. Bakı Dövlət Universitetinin rektoru Elçin Babayevdən diplomumu almaqda köməklik göstərməyini xahiş edirəm”.
Vüsal Qarayevin problemi ilə bağlı saytımıza açıqlama verən BDU-nun mətbuat katibi Günel Orucəliyeva bildirib ki, Vətən müharibəsi iştirakçılarına maksimum yardım etməyə çalışırlar:
“Elmi Şuranın qərarına əsasən alt qrup fənləri onlar üçün ödənişsiz əsaslarla həyata keçirilir. Tələbənin müraciəti əsasında akademik borcunun ləğv edilməsi üçün kəsrə qaldığı fənləri yenidən keçəcək və bu müddətdə ona pedaqoji dəstək göstəriləcək”.шаблоны для dle 11.2