Mirzoyanın Azərbaycan tərəfinə təhvil verilməməsini bəlkə də başa düşmək olar.
Bu sözləri beynəlxalq hüquq üzrə professor Fərhad Mehdiyev Şuşa yaxınlığındakı posta qumbara ataraq, 3 azərbaycanlı əsgəri yaralayan terrorçu Norayr Mirzoyanın rus sülhməramlıları tərəfindən Xankəndidəki separatçı quruma təhvil verilməsini şərh edərkən deyib.
“Mirzoyanın əsgərlərə qumbara atması terror fəaliyyətidir və bütün beynəlxalq aləmdə də bu cür tanınır. Sülhməramlıların cəza vermə səlahiyyəti yoxdur. Lakin bu cür hərəkətlərin qarşısı yalnız həmin şəxslərin cəzalanması ilə alına bilər. Sülhməramlılar özü cəzalandıra bilmirsə, Mirzoyanı cəzalandıra biləcək tərəfə təhvil verməlidir. Məsələ belə qoyulmalıdır: sülhməramlıların onu həbs edib, Xankəndiyə verməsinin hüquqi əsası varmı?” - professor bildirib.
Professorun sözlərinə görə, Xankəndidə məskunlaşan separatçı qurum heç bir hüquqi statusa malik deyil:
“Bu separatçı, qondarma qurum 10 noyabr bəyanatının tərəflərindən biri deyil, bu qurumu nəinki Azərbaycan, heç Ermənistan da tanımır; onlar hansı istintaq apara bilər və bu “istintaqın” necə hüquqi qüvvəsi ola bilər? Sülhməramlılar hansı əsasla, hansı hüquqla terrorçunu atəşkəsin tərəfi olmayan, heç bir hüquqi-siyasi status daşımayan separatçı, qondarma istintaqa təhvil verir? Ermənistana verilsə, bəlkə də anlamaq olardı. Ancaq “Xankəndiyə təhvil verilməsi” anlayış olaraq hüquqa ziddir.
Bu məsələ mütləq şəkildə rus sülhməramlıları qarşısında qaldırılmalı və cavab tələb edilməlidir”.
Qeyd edək ki, Şuşa yaxınlığında azərbaycanlı və rus hərbçilərin olduğu posta qumbara ataraq, 3 azərbaycanlı əsgərin yaralanmasına səbəb olan 1975-ci il təvəllüdlü Norayr Mirzoyanı rus sülhməramlıları yaxalayandan və qərargahda ilkin dindirmədən sonra Xankəndidəki separatçı quruma təhvil veriblər.шаблоны для dle 11.2