“Fransalı deputatlar çox absurd bir iddia ilə çıxış ediblər. Bildirirlər ki, guya Azərbaycan Fransanın daxili işlərinə qarışır. Guya biz Fransanı parçalayırıq. Hətta tənqidə dözməyən ittihamlar... Əvvəla, Fransanın, təxminən, 3 trilyon dollara yaxın ümum daxili məhsulu var, dünyanın nəhəng dövlətləri sırasındadır. BMT Təhlükəsizlik Şurasının 5 daimi üzvündən biridir. NATO, Avropa İttifaqı ölkəsidir. Və biz tarixən də görmüşük ki, böyük dövlətlər kiçik dövlətlərin daxili işlərinə qarışır, onu parçalayır. İndi Azərbaycan kimi böyük olmayan bir dövlət necə Fransa kimi böyük dövlətin daxili işlərinə qarışa, onu parçalaya bilər? Əslində, fransalı deputatların bu iddiaları iki nəticə çıxarmağa əsas verir. Birincisi, ya Fransa bizim təsəvvür etdiyimizdən qat-qat zəifdir və ya zəifləməkdədir, ona görə bu iddia ilə çıxış edirlər. İkincisi, Fransa Azərbaycanı kifayət qədər güclü dövlət hesab edir. Azərbaycan Fransa kimi nəhəng dövlətin daxili işlərinə qarışmağı bacarırsa, deməli, rəsmi Paris Azərbaycanı çox qüdrətli dövlət kimi qəbul edir. Bu isə bizi sevindirir”. 
 
Bu sözləri Pravda.az-a açıqlamasında Azərbaycan-Fransa parlamentlərarası əlaqələr üzrə işçi qrupunun üzvü Elman Nəsirov deyib.
 
Deputat vurğulayıb ki, reallıqda Azərbaycan heç bir dövlətin daxili işlərinə qarışmayıb: “Azərbaycan beynəlxalq hüququn prinsiplərinə sədaqətlə qulluq edir. Bizim daxili işlərimizə qarışmağa da heç kimə imkan vermərik. Azərbaycan Qoşulmama Hərəkatına sədrlik etdiyi 4 il ərzində dünyadakı bütün məzlum xalqların yanında oldu, müstəmləkəçiliyə məruz qalan xalqları müdafiə etdi. Müstəmləkəçilərin əleyhinə mövqe ortaya qoydu. Bunu açıq şəkildə ifadə etdi. Biz Yeni Kaledoniyanın Fransa müstəmləkəçiliyinə qarşı mübarizəsini də, Fransa Polineziyasının Fransanın yeni müstəmləkəçilik siyasətinə qarşı etirazını da dəstəkləyirik. Fransanın Polineziya xalqına qarşı nüvə təhlükəsi yaratmasının əleyhinəyik. Fransa Polineziyada 1966-1996-cı illərdə 193 dəfə nüvə sınağı keçirərək 170 min nəfəri qurbana çevirib. 2010-cu ildə 10 min nəfərə səhhətinə dəyən ziyana görə  kompensasiya verildi. Bunun üçün 800 milyon dollar vəsait ayrıldı. Yerli xalqdan isə cəmi 63 nəfər həmin siyahıya salındı. Biz bu ədalətsizliyin əleyhinəyik. 2013-cü ildən Fransa Polineziyası BMT-nin dekolonizasiya ölkələri siyahısına qəbul edilib. 2013-cü ildən indiyə qədər Fransa maneə olur ki, Polineziyada yaşayan yerli xalq müstəqillik əldə etməsin. Bu prosesdə də yerli əhalini müdafiə edirik. Bütün dünyada müstəmləkəçiliyin və yeni müstəmləkəçilik siyasətinin əleyhinəyik. Bizim günahımız deyil ki, bu gün Fransa bəşəriyyət üçün cinayət hesab ediləbiləcək neokolonializm siyasətinin önündə gedir. Biz bunun əleyhinəyik. Qoy fransalı deputatlar özlərinə sual versinlər ki, niyə ölkələri bəşəriyyət əleyhinə belə bir cinayət siyasəti həyata keçirir? Və niyə bu siyasətin qanunvericilik bazasını yaradırlar?”шаблоны для dle 11.2