“Məlum olduğu kimi, mayın 25-də Azərbaycan Respublikasının Prezidenti cənab İlham Əliyev məhkum olunmuş bir sıra şəxslərin əfvi haqqında Sərəncam imzalayıb. Bu Sərəncamı imzalayarkən ilk növbədə məhkumların, onların ailə üzvlərinin, insan haqları üzrə müvəkkilin cənab Prezidentə əfv barədə ünvanlandıqları müraciətlərinə baxılıb, eyni zamanda məhkumların şəxsiyyəti, səhhəti, ailə vəziyyəti, cəza çəkdikləri müddətdə davranışları kimi əsas amillər nəzərə alınıb. Təbii ki, burada humanizm prinsipləri əsas götürülüb. Nəticədə, Sərəncam 154 nəfər məhkuma şamil edilib. Bu isə artıq 154 ailənin sevinci deməkdir. Siyahıda adı olan insanlar yenidən cəmiyyətimizə inteqrasiya olunmaq şansı qazanıblar. Ümid edirik ki, onlar sonrakı davranışları ilə bir daha geri qayıtmayacaqlar, yeni həyata başlayacaqlar, Azərbaycan cəmiyyəti, dövlətimiz üçün faydalı insanlara çevriləcəklər. Təəssüf ki, humanizm prinsiplərinə söykənən əfv Sərəncamına qarşı bəzi radikal müxalifət dairələri əks mövqe ortaya qoyur, Sərəncamın mahiyyətinə kölgə salmaq istəyirlər. Yenə də müxtəlif çirkli oyunlara start veriblər. Azərbaycan hakimiyyətini ittiham edirlər ki, Sərəncamda heç bir “siyasi məhbus”un adı yoxdur. Guya Azərbaycanda 300-ə qədər siyasi məhbus var, amma heç bir “siyasi məhbus”, “vicdan məhbusu” azadlığa buraxılmayıb... Bu kimi əsassız iddialar irəli sürürlər”. 
 
Bu sözləri Pravda.az-a açıqlamasında Milli Məclisin deputatı Elman Nəsirov deyib.
 
Deputat əfv Sərəncamından narazı qalanlara müraciət edib: “Həmin şəxslərə söyləyirəm ki, biləsiniz, Azərbaycanda “siyasi məhbus” yoxdur! Ola da bilməz! Bəli, Azərbaycanda məhbuslar var, lakin onların məhbus olmalarına gətirib çıxaran səbəblər var. Onların tutduqları cinayət yolu məhbus həyatını şərtləndirib. Heç kim bu gün cinayət törətmədən həbs oluna bilməz. Həbsxanadasansa, bil ki, cinayətə imza atmısan. Başqa cür ola da bilməz. Azərbaycanda heç kim siyasi baxışına, siyasi əqidəsinə görə həbs edilməyib. Bu, məhz Azərbaycan dövlətinin demokratik yol seçdiyinə görə belədir. Hesab edirəm, ittihamların heç bir əsası yoxdur. Qarayaxma kampaniyası həyata keçirənlər istənilən halda köhnə amplualarındadır. Qaralamaq, ləkələmək onların həmişəki xislətidir. Xalqımız da gözəl bilir ki, Azərbaycanda cinayət yolunu seçdinsə, cəzalanırsan. Başqa cür heç kim cəza ala bilməz. Radikal müxalifətin və onun kimilərin hay-həşirinin heç bir mənası yoxdur”.шаблоны для dle 11.2