“Ermənistan iqtisadi və daha sonra siyasi cəhətdən Türkiyədən asılı olacaq”

Bu açıqlama ilə D18 hərəkatının lideri Ruslan İzzətli çıxış edib. 

Onun sözlərinə görə, Türkiyənin Ermənistanla sərhədləri açmağı heç də mənfi hadisə deyil:


“Türkiyə-Ermənistan sərhədlərinin açılması millət və dövlət olaraq bizim xeyirimizədir. Yalnız və yalnız Rusiyanın imperiya maraqlarına qarşıdır.

Düşünün, bu gün Ermənistan iqtisadi cəhətdən Rusiyadan asılıdır. İqtisadi asılılıq həm də siyasi asılılıq deməkdir. Nəticədə Rusiyanın izni olmadan Ermənistan heç bir addım ata bilmir. Amma sərhədlər açıldıqdan sonra Ermənistanda Rusiya yox, Türkiyə iqtisadi cəhətdən güc olacaq. Nəticədə Ermənistan iqtisadi və daha sonra siyasi cəhətdən Türkiyədən asılı olacaq. 

Regionda Türkiyənin güc olması regionun demokratikləşməsinə və sorunların daha ədalətli həllinə gətirib çıxardacaq. 20 ildən çoxdur sərhədlər bağlıdır, nəticə nədir? Bu 20 ildə 20 metr irəli addım atdıqmı? Lütfən, Qarabağ dərdimizi kimsə əlinə bayraq edib milləti aldatmasın. Daha realist və daha strateji düşünməmiz lazımdır”.