Xəbər verdiyimiz kimi, bu gün Azərbaycan Mərkəzi Bankında bank rəhbərləri ilə görüş keçirilib.

Mediatv.az:  Virtualaz.org-un bank sektorundakı mənbələrdən əldə etdiyi məlumata görə, toplantıda valyuta mübadilə əməliyyatlarının aparılması zamanı müəyyən olunmuş faiz dəhlizinin, yəni marjanın (hazırda -/+4%) ləğv olunması barədə qərar qəbul olunub.

Belə ki, AMB rəhbərliyi tam üzən məzənnə rejiminə keçidə hazır olduğunu bankların diqqətinə çatdırıb. Qeyd olunub ki, xırda detallar həllini tapdıqdan sonra tam üzən məzənnə rejiminə keçid tam baş tutacaq. Bu isə o deməkdir ki, banklar tələb və təklifi nəzərə alaraq valyuta alqı-satqısı zamanı məzənnəni özləri müəyyənləşdirəcəklər.

Qeyd edək ki, müəyyən edilmiş həmin marja banklara valyutanı Mərkəzi Bankın rəsmi kursundan 4% artığına satmağa icazə vermirdi. Bu da "qara bazar"ın yaranmasına gətirib çıxarmışdı. Başqa sözlə, bu qərar "qara bazar”ın tam yox olmasına gətirib çıxaracaq. Çünki indiki halda valyutanın satışı məsələlərində onun kommersiya banklarından heç bir üstünlüyü qalmır.