Türkiyə hərbi təyyarələri tərəfindən vurulan Rusiyaya məxsus “Su24” hərbi təyyarəsinin katapult edən pilotlarından biri Suriya türkmənlərinin əlindədir.

Mediatv.az xəbər verir ki, bunu “CNN Türk”ün Türkiyə-Suriya sərhədindəki Hatay vilayətindəki müxbiri Xədicə Dəmircan deyib. 

Onun sözlərinə görə, katapult edən 2 rus pilotdan biri türkmənlərin əlindədir. O, hazırda Bayırbucak bölgəsində saxlanılır: “ Hazırda Türkmənlər o biri pilotun axtarışlarını davam etdirir. Ərazidə vəziyyət gərgin olaraq qalır. Çünki, təyyarənin vurulmasından 20-25 dəqiqə sonra burada bombardıman başladı”.

Jurnalist həmçinin Rusiya hərbi helikopterlərinin hazırda pilotları tapmaq üçün bölgədə uçuşlar həyata keçirdiyini də diqqətə çatdırıb. O, bildirilib ki, pilotları almaq üçün iki helikopterin həmin əraziyə eniş etməsinə türkmən özünümüdafiə qüvvələri icazə vermir.