Suriya kürdlərinin “Xalq Özünümüdafiə Dəstələri” (YPG) qruplaşması bir neçə üsyançı qruplarla yeni alyans yaratdığını bəyan edib.
Mediatv.az-ın “RİA Novosti”yə istinadən verdiyi məlumata görə, yeni alyans “Suriya Demokratik Qüvvələri” adlandırılıb.
YPG-nin “Facebook” səhifəsində bildirilir ki, Suriyadakı kürdləri, ərəbləri, aysorları və digər etnik qrupları birləşdirəcək “ümummilli hərbi qüvvə”nin yaradılmasına tələbat var.
Qeyd edək ki, YPG və qadın kürd döyüşçülərini birləşdirən YPJ qruplaşmaları Suriyada ən böyük kürd partiyası olan PYD-yə (Demokratik İttifaq Partiyası) tabedir. Sözügedən qruplar kürd rayonlarını İŞİD-dən müdafiə üçün ABŞ koalisiyasından güclü dəstək görür.
Bu yaxınlarda kürd döyüşçüləri və ərəb müxaliflərin birgə alyans şəklində İŞİD üzərinə hücuma keçəcəyi, bu planın isə ABŞ prezidenti Barak Obama tərəfindən təsdiqləndiyi barədə qeyri-rəsmi məlumatlar yayılmışdı.